कञ्चनपुर । कञ्चनपुरको भीमदत्त नगरपालिका–९ स्थित ऐतिहासिक ५२ ढोके दरबारको शनिबार सरसफाइ गरिएको छ। स्थानीय दीपेन्द्रसिंह ऐरको अगुवाइमा दरबार परिसरमा सरसफाइ गरिएको हो।
सरसफाइ कार्यक्रममा इलाका प्रहरी कार्यालय ब्रह्मदेव, सशस्त्र प्रहरी बल टुडिखेलका सुरक्षाकर्मी तथा स्थानीयको सहभागिता रहेको थियो।
माटोको गारो तथा ढुंगैढुंगाबाट निर्मित ५२ ढोके दरबार उचित संरक्षण, संवर्द्धन र रेखदेखको अभावमा जीर्ण बन्दै गएको छ। प्राचीन व्यापारिक नाकाका रूपमा परिचित ब्रह्मदेव मण्डीमा रहेको उक्त ऐतिहासिक संरचना सयौँ वर्षअघि निर्माण भएको स्थानीय बताउँछन्।
जिल्लाकै महत्वपूर्ण ऐतिहासिक संरचनाका रूपमा रहेको ५२ ढोके दरबारको राज्यले संरक्षण गर्नुपर्ने स्थानीय दीपेन्द्रसिंह ऐरले बताए। उनका अनुसार ऐतिहासिक महत्व बोकेको उक्त संरचनालाई अध्ययन तथा अवलोकनको केन्द्रसँगै पर्यटकीय गन्तव्यका रूपमा समेत विकास गर्न सकिन्छ।
उनले ब्रह्मदेव मण्डी तथा ५२ ढोके दरबारको ऐतिहासिक महत्वलाई उजागर गर्दै संरक्षणका लागि सम्बन्धित निकायले आवश्यक पहल गर्नुपर्ने बताए।
Discussion about this post