फिफा विश्वकप फुटबलको प्रिक्वाटरफाइनलअन्तर्गत आज राति दुई शक्तिशाली युरोपेली टोली पोर्चुगल र स्पेन आमनेसामने हुँदैछन्। अमेरिकाको डालास रङ्गशालामा हुने यो खेल नेपाली समयअनुसार राति पौने १ बजे सुरु हुनेछ।
पोर्चुगलले नकआउट चरणमा क्रोएशियालाई २–१ ले हराउँदै अन्तिम १६ मा स्थान बनाएको हो भने स्पेनले अस्ट्रियामाथि ३–० को सहज जित निकाल्दै प्रिक्वाटरफाइनल यात्रा तय गरेको हो। पोर्चुगल समूह ‘के’ को उपविजेता तथा स्पेन समूह ‘एच’ को विजेताका रूपमा नकआउट चरणमा पुगेका हुन्।
विश्वकप इतिहासमा यी दुई टोलीबीच यो तेस्रो भेट हुनेछ। यसअघि सन् २०१० को विश्वकपमा स्पेनले पोर्चुगललाई १–० ले पराजित गरेको थियो भने सन् २०१८ मा दुवै टोलीबीचको खेल ३–३ को रोमाञ्चक बराबरीमा सकिएको थियो। उक्त खेलमा पोर्चुगलका कप्तान क्रिस्टियानो रोनाल्डोले ह्याट्रिक गरेका थिए।
समग्र अन्तर्राष्ट्रिय भेटमा स्पेनको स्पष्ट वर्चस्व देखिएको छ। हालसम्म ४१ खेलमा स्पेनले १८, पोर्चुगलले ७ जित निकालेका छन् भने १६ खेल बराबरीमा टुंगिएका छन्।
आजको खेललाई दुई फरक पुस्ताका स्टार खेलाडीबीचको प्रतिस्पर्धाका रूपमा पनि हेरिएको छ। पोर्चुगलका ४१ वर्षीय क्रिस्टियानो रोनाल्डो र स्पेनका १८ वर्षीय लामिन यमाल पहिलो पटक विश्वकपको नकआउट चरणमा आमनेसामने हुँदैछन्। रोनाल्डोले सन् २००६ मा पहिलो विश्वकप खेल्दा यमाल जन्मिएका पनि थिएनन्।
यस्तै, प्रिक्वाटरफाइनलअन्तर्गत भोलि बिहान पौने ६ बजे अमेरिका र बेल्जियमबीच प्रतिस्पर्धा हुनेछ। अमेरिकाको सिएटल रङ्गशालामा हुने खेलमा अमेरिकाले बोस्निया एन्ड हर्जगोभिनालाई २–० र बेल्जियमले सेनेगललाई ३–२ ले पराजित गर्दै अन्तिम १६ मा स्थान सुरक्षित गरेका हुन्।
विश्वकपमा अमेरिका र बेल्जियमबीच यो तेस्रो भेट हुनेछ। सन् १९३० मा अमेरिका ३–० ले विजयी भएको थियो भने सन् २०१४ मा बेल्जियमले २–१ को जित निकालेको थियो। समग्र सात भेटमा बेल्जियमले ६ खेल जित्दा अमेरिका एक खेलमा मात्रै विजयी भएको छ।
Discussion about this post