वेदकोट–९ मा बौद्धिक अपाङ्गता दिवस मनाइयो; सीपमूलक तालिम र रोजगारीमा अभिभावकको जोड

महेन्द्रनगर, कञ्चनपुर ।

कञ्चनपुरको वेदकोट नगरपालिका–९ मा विविध चेतनामूलक तथा सांस्कृतिक कार्यक्रमका साथ बौद्धिक अपाङ्गता दिवस भव्य रूपमा मनाइएको छ। बौद्धिक अपाङ्गता अभिभावक संघ कञ्चनपुरको आयोजना तथा वेदकोट नगरपालिकाको आर्थिक एवं प्राविधिक सहयोगमा उक्त कार्यक्रम सम्पन्न भएको हो।

“हाम्रो बारे निर्णय, हामीसँगै, हामीलाई बुझेर” भन्ने मूल नाराका साथ आयोजना गरिएको उक्त कार्यक्रमले बौद्धिक अपाङ्गता भएका व्यक्तिहरूको अधिकार, सम्मान र समाजमा समावेशी सहभागिताका विषयमा जनचेतना जगाउने उद्देश्य राखेको थियो।

अधिकार र समान पहुँचमा जोड

कार्यक्रममा बोल्दै बौद्धिक अपाङ्गता अभिभावक संघ कञ्चनपुरका अध्यक्ष शान्ती मल्लले बौद्धिक अपाङ्गता भएका व्यक्तिहरूलाई शिक्षा, स्वास्थ्य, रोजगारी तथा सामाजिक अवसरहरूमा समान पहुँच सुनिश्चित गरिनुपर्नेमा जोड दिनुभयो। उहाँले भन्नुभयो:

“बौद्धिक अपाङ्गता भएका व्यक्तिहरू पनि समाजका महत्त्वपूर्ण र सम्मानित सदस्य हुन्। उनीहरूको क्षमता विकास, आत्मनिर्भरता र सामाजिक समावेशीकरणका लागि राज्य, स्थानीय सरकार र नागरिक समाज सबै पक्षको सहकार्य अपरिहार्य छ।”

अभिभावकको माग: ‘छोराछोरीलाई माया, हामीलाई सीप’

कार्यक्रममा आफ्ना भोगाइ र अनुभवहरू साझा गर्दै बौद्धिक अपाङ्गता भएका बालबालिकाका अभिभावक कलावती भट्टले राज्य तथा स्थानीय तहबाट अझै ठोस सहयोगको अपेक्षा व्यक्त गर्नुभयो। आफ्ना सन्तान बौद्धिक रूपमा अपाङ्गता भएका कारण उनीहरूको हेरचाहसँगै जीविकोपार्जनमा समस्या हुने गरेको उल्लेख गर्दै उहाँले सरकारसँग अभिभावकहरूका लागि विशेष सीपमूलक तथा रोजगारमुखी तालिमको व्यवस्था गर्न माग गर्नुभयो।

सांस्कृतिक प्रस्तुति र उत्साहजनक सहभागिता

स्थानीय जनप्रतिनिधि, सामाजिक अभियन्ता, सरोकारवाला निकायका प्रतिनिधि, बौद्धिक अपाङ्गता भएका बालबालिका तथा ठुलो संख्यामा अभिभावकहरूको सहभागिता रहेको उक्त कार्यक्रममा बालबालिकाहरूले विभिन्न सांस्कृतिक प्रस्तुतिहरू समेत प्रदर्शन गरेका थिए।

यस्ता कार्यक्रमले बौद्धिक अपाङ्गता भएका व्यक्तिहरूप्रति समाजमा व्याप्त नकारात्मक दृष्टिकोण र भ्रमहरूलाई चिर्दै सकारात्मक सोचको विकास गर्न ठुलो सहयोग पुग्ने विश्वास आयोजक संस्थाले व्यक्त गरेको छ।