कञ्चनपुर । एपेक्स गोदावरी एकेडेमीले आफ्नो १९ औँ वार्षिकोत्सव तथा अभिभावक दिवस सम्पन्न गरेको छ।
शनिबार विद्यालय प्राङ्गणमा आयोजित उक्त कार्यक्रममा विद्यार्थी, अभिभावक तथा शिक्षाप्रेमीहरूको उत्साहजनक उपस्थिति रहेको थियो।
कार्यक्रममा प्रमुख अतिथि एवम् सुदूरपश्चिम विश्वविद्यालय, शिक्षा संकायका विभाग प्रमुख प्राध्यापक डा. मदन सिंह देउपाले विद्यालयले पुर्याएको योगदानको चर्चा गर्नुभयो। उहाँले गुणस्तरीय शिक्षा आजको आवश्यकता रहेको औंल्याउँदै एकेडेमीले विद्यार्थीको शैक्षिक जग बलियो बनाउन खेलेको भूमिका प्रशंसनीय रहेको बताउनुभयो।
विद्यालयका प्रिन्सिपल दिपक बहादुर चन्दले विद्यालयको वार्षिक प्रतिवेदन प्रस्तुत गर्दै शैक्षिक गतिविधिबारे प्रकाश पार्नुभएको थियो। उहाँले विद्यालयमा हाल कक्षा १ देखि १२ सम्म अध्यापन भइरहेको र ४०० भन्दा बढी विद्यार्थीहरू अध्ययनरत रहेको जानकारी दिनुभयो। प्रिन्सिपल चन्दले विद्यार्थीको संख्यासँगै शिक्षाको गुणस्तरलाई पनि उच्च राख्न विद्यालय सधैं तत्पर रहेको उल्लेख गर्नुभयो।
विद्यालय सञ्चालक समितिका अध्यक्ष हरीश जोशीले अभिभावकहरूको अटुट विश्वासले नै विद्यालय यहाँसम्म आइपुगेको बताउनुभयो। उहाँले विद्यालयको भौतिक संरचनामा सुधार गर्दै आगामी नयाँ शैक्षिक सत्रदेखि विद्यालयले आफ्नै नवनिर्मित भवनबाट सेवा प्रदान गर्ने महत्त्वपूर्ण घोषणा समेत गर्नुभयो। कार्यक्रमको सभापतित्व गरिरहनुभएका अध्यक्ष जोशीले आगामी दिनमा प्रविधिमैत्री शिक्षा र थप व्यवस्थित शैक्षिक वातावरण निर्माण गर्ने प्रतिबद्धता समेत व्यक्त गर्नुभयो।
वार्षिकोत्सवको अवसरमा विद्यार्थीहरूले विभिन्न लोक नृत्य, गीत तथा सांस्कृतिक प्रस्तुति लगायत पुरस्कार समेत वितरण गरिएको थियो।
Discussion about this post