काठमाडौँ । आज फागुन ७ गते देशभर विभिन्न कार्यक्रम गरी निर्वाचन दिवस मनाइँदैछ। नेपालमा पहिलो आम चुनाव २०१५ साल फागुन ७ गते सुरु भई २०१६ साल वैशाख २१ गते सम्पन्न भएको थियो। बालिग मताधिकारका आधारमा सम्पन्न उक्त चुनाव नै नेपालको पहिलो आम निर्वाचन हो। सोही ऐतिहासिक दिनको स्मरणमा हरेक वर्ष फागुन ७ गते निर्वाचन दिवस मनाउने गरिएको छ।
यस वर्ष प्रतिनिधिसभा सदस्य निर्वाचनको तयारीमै केन्द्रित हुनुपरेकाले निर्वाचन आयोग ले कान्तिपथस्थित आफ्नै परिसरमा कार्यक्रम आयोजना गरी दिवस मनाउने जनाएको छ। आयोगका सूचना अधिकारी सुमन घिमिरेका अनुसार सीमित तर औपचारिक कार्यक्रममार्फत दिवस मनाइँदैछ।
यस अवसरमा कार्यवाहक प्रमुख निर्वाचन आयुक्त रामप्रसाद भण्डारी ले राजनीतिक दल तथा उम्मेदवारलाई स्वतन्त्र र निर्बाध रूपमा चुनावी प्रचार–प्रसार गर्न आह्वान गर्नुभएको छ। उहाँले निर्वाचनमा खटिएका कर्मचारी, अनुगमनकर्ता, पर्यवेक्षक तथा आम मतदातालाई आवश्यक सुरक्षाको प्रत्याभूति दिँदै स्वच्छ, स्वतन्त्र, निष्पक्ष र शान्तिपूर्ण वातावरणमा मतदान सम्पन्न गराउन सबै पक्षसँग अपिल गर्नुभएको छ।
भण्डारीले स्वच्छ, स्वतन्त्र, विश्वसनीय, पारदर्शी तथा मितव्ययी निर्वाचन नै शान्ति, स्थिरता, समृद्धि र सुशासनको आधार भएको उल्लेख गर्दै फागुन २१ गते हुने प्रतिनिधिसभा सदस्य निर्वाचन सफल बनाउन सबै सरोकारवालाबीच समन्वय, सहयोग र सहकार्य आवश्यक रहेको बताउनुभयो। उहाँले गएको भदौ २३ र २४ गते भएको नवयुवा विद्रोहपछि राष्ट्रपतिबाट घोषणा गरिएको निर्वाचनले देशको राजनीतिक अनुशासनलाई सही मार्गमा ल्याउने विश्वास व्यक्त गर्नुभयो।
मतदानको दिन आउन अब १४ दिन मात्र बाँकी रहेको छ। यसपटकको निर्वाचन दिवस आयोगका लागि मात्र नभई आम मतदाता, नागरिक समाज, राजनीतिक दल तथा उम्मेदवारका लागि पनि विशेष र अविस्मरणीय अवसर बनेको आयोगको भनाइ छ।
Discussion about this post