बेडफोर्ड, टेक्सस । युवा व्यवसायीहरूको साझा संस्था फिने अमेरिका (FINA America) को आयोजनामा अमेरिकामा आर्थिक अवसर तथा व्यवसायिक विकासका विषयमा एक विशेष ‘मिट एण्ड ग्रिट’ तथा सेमिनार सम्पन्न भएको छ।
टेक्ससको बेडफोर्डमा गत शनिबार आयोजित उक्त कार्यक्रममा ‘फाइनान्सियल अपरच्युनिटी’ विषयमा केन्द्रित रहेर छलफल गरिएको थियो। कार्यक्रममा भक्ति फाइनान्स ग्रुपका प्रमुख गगन केसीले मुख्य प्रशिक्षकको रूपमा कार्यपत्र प्रस्तुत गर्नुभएको थियो।
आर्थिक स्वतन्त्रतामा जोड
प्रशिक्षणका क्रममा केसीले अमेरिकामा बसोबास गर्ने नेपाली समुदायले कुन-कुन तरिकाबाट आर्थिक स्वतन्त्रता (Financial Freedom) प्राप्त गर्न सक्छन् र त्यसका लागि के-कस्ता प्रक्रियाहरू अपनाउनु आवश्यक छ भन्नेबारे विस्तृत जानकारी दिनुभयो। उहाँले सही लगानी र वित्तीय व्यवस्थापन नै समृद्धिको आधार भएको उल्लेख गर्नुभयो।
युवा उद्यमीहरूको उत्साहजनक सहभागिता
डालस फोर्टवर्थ क्षेत्रका युवा व्यवसायीहरूको उल्लेख्य सहभागिता रहेको उक्त कार्यक्रममा नेटवर्किङ र अनुभव आदानप्रदान समेत गरिएको थियो। कार्यक्रमका बारेमा बोल्दै फिने अमेरिकाका अध्यक्ष सवीन्द्र थापाले यस्ता सेमिनारहरूले नयाँ उद्योग-व्यवसाय सुरु गर्न चाहने युवाहरूमा ऊर्जा र उत्प्रेरणा थप्ने विश्वास व्यक्त गर्नुभयो।
“हाम्रो लक्ष्य भनेको उद्यमी बन्न चाहनेहरूलाई एउटै प्लेटफर्ममा ल्याएर उनीहरूलाई आवश्यक परामर्श र नेटवर्किङको अवसर प्रदान गर्नु हो,” अध्यक्ष थापाले भन्नुभयो।
फिने अमेरिकाको अभियान
फिने अमेरिकाले लामो समयदेखि अमेरिकामा व्यवसाय गरिरहेका वा नयाँ व्यवसाय सुरु गर्न चाहने नेपालीहरूलाई लक्षित गरी विभिन्न परामर्श र सहयोगका कार्यक्रमहरू सञ्चालन गर्दै आएको छ। आगामी दिनमा पनि यस्ता व्यावसायिक साक्षरताका कार्यक्रमहरूलाई निरन्तरता दिइने संस्थाले जनाएको छ।
Discussion about this post