कञ्चनपुर । कञ्चनपुरको महेन्द्रनगरस्थित रेडियन्ट माध्यमिक विद्यालयका विद्यार्थीहरूले चिकित्सा शिक्षा क्षेत्रमा उत्कृष्ट प्रदर्शन गर्दै ठुलो उपलब्धि हासिल गरेका छन्। सुदूरपश्चिम प्रदेश सरकारले प्रदान गर्ने चिकित्सा शिक्षा छात्रवृत्तिमा यस विद्यालयका विद्यार्थीहरूले उत्कृष्ट नतिजा निकाल्न सफल भएका हुन्।
विद्यालयका अनुसार हालसम्म ३ जनाले डाक्टर र ५ जनाले नर्सिङ विषयमा पूर्ण छात्रवृत्तिमा नाम निकालेका छन्। छात्रवृत्ति अन्तर्गत डाक्टर (MBBS) तर्फ दिनेश थापा, सन्देश जोशी र सौरभ पन्तले सफलता प्राप्त गरेका छन्। त्यसैगरी नर्सिङतर्फ कविता जोशी, बिनिता भट्ट, खुसी चन्द, निर्मला पाण्डे र जितेश कठायतले नाम निकाल्न सफल भएका छन्। सफलता प्राप्त गर्ने यी सबै विद्यार्थीहरूलाई विद्यालयमा एक कार्यक्रमका बीच सम्मान समेत गरिएको छ।
यसअघि चिकित्सा शिक्षा स्नातक तह (MECEE-BL 2026) एमबिबिएस एकीकृत प्रवेश परीक्षामा पनि रेडियन्ट माध्यमिक विद्यालयका विद्यार्थीहरूले उत्कृष्ट नतिजा ल्याएका थिए। ७ जना विद्यार्थीले पूर्ण निःशुल्क छात्रवृति प्राप्त गर्न सफल भएका थिए।
नर्सिङतर्फ नाम निकाल्ने विद्यार्थीहरूको संख्या अझै बढ्न सक्ने विद्यालय प्रशासनले जानकारी दिएको छ। रेडियन्ट माविले शैक्षिक क्षेत्रमा निरन्तर उत्कृष्टता कायम गर्दै आइरहेको यो नतिजाले पुनः पुष्टि गरेको छ।
विद्यार्थीहरूको यो सफलतामा खुसी व्यक्त गर्दै रेडियन्टका प्रधानाध्यापक त्रिभुवन भट्टले यसलाई विद्यालयको ठुलो उपलब्धिका रूपमा लिएका छन्। उनले भने, “हामीले हाम्रा विद्यार्थीहरूको लगन र मेहनतको प्रतिफल देख्दा अत्यन्त गर्व महसुस गरेका छौं। यसले हाम्रो विद्यालयको शैक्षिक स्तर अझ माथि उठाउने विश्वास दिलाएको छ।” यस वर्षको प्रवेश परीक्षाको परिणामले विद्यालयको प्रतिष्ठामा थप उज्ज्वलता थपेको विद्यालयले जनाएको छ।
छात्रवृत्तिमा नाम निकाल्न सफल विद्यार्थीहरू सन्देश जोशी र बिनिता भट्टले आफ्नो सफलताको श्रेय विद्यालयको उत्कृष्ट शिक्षण पद्धति र शिक्षकहरूको उचित मार्गदर्शनलाई दिएका छन्। उनीहरूले विद्यालयले प्रदान गरेको शैक्षिक वातावरणकै कारण आज यो सफलता सम्भव भएको बताए।
Discussion about this post