बैतडी । बैतडीको गुरुखोलामा आज स्वतन्त्र सनातनीहरूको महाअभियान घोषणा गरिएको छ। स्वतन्त्र सनातनी महाअभियानका संयोजक अमरबहादुर टेरले औपचारिक रूपमा अभियानको घोषणा गर्दै युवाहरूलाई पार्टीगत राजनीति परित्याग गरी सनातन धर्मको संरक्षण र राष्ट्र निर्माणमा एकजुट हुन आग्रह गर्नुभएको छ।
अभियान घोषणा कार्यक्रममा बोल्दै संयोजक टेरले पार्टीका झण्डा बोकेर हिँड्दा देश संकटतर्फ धकेलिएको अवस्था आएको दाबी गर्नुभयो। उहाँले अब देशको झण्डा र सनातन धर्मको ध्वजा बोकेर राष्ट्र निर्माणमा जुट्नुपर्ने आवश्यकता औंल्याउनुभयो। राजनीतिक दलहरूमा संलग्न धेरै शक्तिहरू सनातन धर्म विरोधी भएको आरोप लगाउँदै उहाँले सबै सनातनीहरूलाई पार्टीको घेराबन्दीबाट बाहिरिएर ‘घर फर्किन’ आह्वान गर्नुभयो।
संयोजक टेरले देशलाई धर्मनिरपेक्ष घोषणापछि धर्म परिवर्तनको खेल बढ्दै गएको र पश्चिमा शक्तिहरूले नेपालमा अशान्ति फैलाएर देश बर्बाद गर्ने षड्यन्त्र गरिरहेको आरोप पनि लगाउनुभयो। उहाँका अनुसार यस्ता गतिविधिबाट देश, धर्म र समाजमाथि गम्भीर खतरा उत्पन्न भएको छ।
महाअभियानअन्तर्गत ३३ बुँदे एजेन्डा सार्वजनिक गरिएको छ। ती एजेन्डामा सरकारले नागरिकलाई निःशुल्क शिक्षा, स्वास्थ्य र खानेपानीजस्ता आधारभूत सेवा उपलब्ध गराउनुपर्ने, युवालाई उत्पादन, श्रम, सीप र प्रविधिसँग जोडेर रोजगारी सिर्जना गर्नुपर्ने, जनताको चाहनाअनुसार जनमुखी सरकार निर्माण हुनुपर्ने, वैदिक सनातन हिन्दु राष्ट्र पुनः स्थापना गर्नुपर्ने, प्रदेश संरचना खारेज गर्नुपर्ने तथा राष्ट्रिय सहमति र एकताका आधारमा सुधारिएको लोकतान्त्रिक व्यवस्था लागू गर्नुपर्ने माग समावेश छन्।
त्यसैगरी विज्ञान–प्रविधिमा आधारित आध्यात्मिक समाजवाद लागू गर्ने, गाउँ, गौमाता, स्वाभिमान र पहिचानको रक्षा गर्ने, नेपाली लगानीमा विकास आयोजना सञ्चालन गर्ने, विश्वस्तरीय पर्यटन प्रवर्द्धन गर्ने, बहुमूल्य जडिबुटी प्रशोधन, काठ उत्पादन, खानी उत्खनन तथा हिमालको पानी प्रशोधन गरी अन्तर्राष्ट्रिय बजारमा पुर्याउने र सनातन संस्कार तथा शिक्षाको विकास गर्नुपर्ने एजेन्डा पनि सार्वजनिक गरिएको छ।
यो अभियानलाई स्वजागरण अभियानको रूपमा अगाडि बढाइने बताउँदै संयोजक टेरले परिवर्तन आफूबाटै सुरु गर्ने लक्ष्य रहेको जानकारी दिनुभयो। राजनीतिक कारणले विभाजित भएको समाजलाई एकताबद्ध गर्नु नै अभियानको मुख्य उद्देश्य रहेको उहाँको भनाइ छ।
यसै अवसरमा आज (शनिबार) परेको राष्ट्रिय एकता दिवस तथा पृथ्वीनारायण शाहको ३०४औँ जन्मजयन्तीको सन्दर्भ उल्लेख गर्दै अभियानले सरकारसँग नेपाली नोटहरूमा राष्ट्रनिर्माता पृथ्वीनारायण शाहको तस्बिर अंकित गर्न विनम्र अनुरोधसमेत गरेको छ।
Discussion about this post