कञ्चनपुरको वेदकोट–६ र ८ का ९३ परिवार जग्गाको मालिक बने

कञ्चनपुर । कञ्चनपुरको वेदकोट नगरपालिका वडा नम्बर–६ र –८ का लामो समयदेखि लालपुर्जाबिहीन रूपमा बस्दै आएका नागरिकहरू अब आफ्नै जग्गाको कानुनी मालिक बनेका छन्। बिहीबार वेदकोट नगरपालिका वडा नम्बर–८ को प्राङ्गणमा आयोजित विशेष कार्यक्रममा दुवै वडाका गरी ९३ जनालाई लालपुर्जा वितरण गरिएको हो।

वेदकोट नगरपालिकाका भूमि शाखा प्रमुख केशब भट्टका अनुसार वडा नम्बर–६ का ३० परिवार र वडा नम्बर–८ का ६३ परिवारलाई लालपुर्जा वितरण गरिएको हो। लालपुर्जा पाएसँगै वर्षौंदेखि अस्थिर अवस्थामा बस्दै आएका स्थानीयले जग्गाको कानुनी स्वामित्व प्राप्त गरेका छन्।

लालपुर्जा वितरण कार्यक्रम भूमि आयोगका केन्द्रीय अध्यक्ष हरि प्रसाद रिजालको प्रमुख आतिथ्यतामा तथा वेदकोट नगरपालिकाका नगर प्रमुख भोजराज बोहराको सभाध्यक्षतामा सम्पन्न भएको हो। कार्यक्रममा स्थानीय जनप्रतिनिधि, कर्मचारी तथा नागरिकहरूको उल्लेख्य उपस्थिति रहेको थियो।

कार्यक्रमलाई सम्बोधन गर्दै भूमि आयोगका केन्द्रीय अध्यक्ष हरि प्रसाद रिजालले संविधानले प्रत्येक नागरिकलाई सम्पत्तिको हक र आवासको हक सुनिश्चित गरेको उल्लेख गरे। उनले कुनै पनि नागरिक भूमिहीन वा आवासविहीन हुन नपाउने व्यवस्था संविधानमै रहेको बताउँदै सो अधिकार कार्यान्वयन गर्न नेपाल सरकारले भूमि आयोगमार्फत यो प्रक्रिया अघि बढाएको बताए।

वेदकोट नगरपालिकाका नगर प्रमुख भोजराज बोहराले लालपुर्जाबिहीन नागरिकको समस्या समाधानका लागि नगरपालिकाले आयोगसँग समन्वय गर्दै आवश्यक सबै सहयोग उपलब्ध गराइरहेको बताए। उनले आयोगले जिम्मेवारीपूर्वक र द्रुत गतिमा काम गर्दै यो अभियानलाई निरन्तरता दिनुपर्नेमा जोड दिए।

लालपुर्जा प्राप्त गरेका स्थानीय प्रकाश रानाले लामो समयदेखिको सपना पूरा भएको अनुभूति भएको बताए। उनले अब आफ्नै नाममा जग्गाको कानुनी स्वामित्व पाएपछि सुरक्षित र स्थिर जीवनयापन गर्न सहज हुने बताए।

त्यस्तै वेदकोट नगरपालिकाका निवर्तमान नगर प्रमुख अशोक कुमार चन्दले लालपुर्जा वितरणले सामाजिक न्याय सुनिश्चित गर्न महत्त्वपूर्ण भूमिका खेलेको उल्लेख गरे। उनले यसले स्थानीय नागरिकलाई स्थायित्व र सम्मान दिएको बताए।

वेदकोट नगरपालिकाकी नगर उप–प्रमुख तुलसी जोशीले लालपुर्जा वितरणले विशेषगरी महिला, विपन्न तथा सुकुम्बासी परिवारको जीवनस्तर सुधारमा सहयोग पुग्ने बताइन्। उनले यो अभियानलाई अझ प्रभावकारी ढंगले अगाडि बढाउनुपर्ने आवश्यकता औँल्याइन्।

वेदकोट नगरपालिका वडा नम्बर–८ का वडा अध्यक्ष महेश राज जोशीले लालपुर्जा वितरण कार्यक्रम वडाका नागरिकका लागि ऐतिहासिक उपलब्धि भएको बताए। उनले लामो समयदेखि लालपुर्जाबिहीन भएर बस्न बाध्य स्थानीय बासिन्दाको समस्या समाधान गर्न वडा कार्यालयले निरन्तर पहल गर्दै आएको बताए।