कञ्चनपुर । कञ्चनपुर निर्वाचन क्षेत्र नम्बर २ मा नेकपा (एमाले) बाट प्रतिनिधि सभा सदस्य उम्मेदवार सिफारिशका लागि तीन जना निर्वाचित भएका छन्। एमाले निर्वाचन क्षेत्र नं. २ समन्वय कमिटीको आयोजनामा आइतबार सम्पन्न निर्वाचनबाट अशोक कुमार चन्द, पूर्व सांसद नरबहादुर धामी र पार्वती जोशी उम्मेदवार सिफारिशका लागि चयन भएका हुन्।
शनिबार बसेको आकांक्षीबीचको छलफलबाट सहमति हुन नसकेपछि आइतबार निर्वाचन प्रक्रिया अपनाइएको थियो। प्रतिनिधि सभा सदस्य उम्मेदवारका लागि पूर्व सांसद नरबहादुर धामी, बेदकोट नगरपालिकाका निवर्तमान मेयर अशोक कुमार चन्द, राष्ट्रिय युवा संघका पूर्व अध्यक्ष बचन बहादुर सिंह, एमाले कञ्चनपुर अध्यक्ष लक्ष्मी बुढा र पार्वती जोशी प्रतिस्पर्धामा थिए।
निर्वाचन परिणामअनुसार अशोक कुमार चन्द र नरबहादुर धामी पुरुष खुला तर्फबाट तथा पार्वती जोशी महिला कोटाबाट उम्मेदवार सिफारिशका लागि निर्वाचित भएका छन्। निवर्तमान मेयर चन्दले सबैभन्दा बढी ६९ मत प्राप्त गरेका छन्। पूर्व सांसद धामीले ५७ मत पाएका छन् भने बचन बहादुर सिंह ५० मतसहित सिफारिश हुनबाट रोकिएका छन्।
एमाले कञ्चनपुरका अध्यक्ष लक्ष्मी बुढाले ४१ मत प्राप्त गरेकी छन्। उनीभन्दा तीन मत बढी ल्याउँदै पार्वती जोशी ४४ मतसहित सिफारिशका लागि निर्वाचित भएकी हुन्। जोशी एमाले सुदूरपश्चिम प्रदेश कमिटी सचिवालय सदस्य हुन्। उनी २०७९ को निर्वाचनमा बेदकोट नगरपालिकाको उपमेयर पदमा पराजित भएकी थिइन् भने यसअघि एमालेको ११औँ महाधिवेशनमा प्रतिनिधि रहेकी थिइन्।
प्रतिनिधि सभा सदस्य सिफारिशका लागि निर्वाचित अशोक कुमार चन्द एमाले कञ्चनपुरका उप–सचिव तथा निर्वाचन क्षेत्र नं. २ का समन्वय कमिटी संयोजक हुन्। २०७९ को स्थानीय तह निर्वाचनमा बेदकोट नगरपालिकाका मेयर निर्वाचित भएका चन्दले एमालेको ११औँ महाधिवेशनमा नेतृत्व हस्तान्तरणको मुद्दा उठाएका थिए। सरल र हक्की स्वभावका चन्द एमालेका विभिन्न संगठनात्मक जिम्मेवारीमा सक्रिय रहँदै आएका छन्।
निर्वाचित तीनै जना उम्मेदवार बेदकोट नगरपालिकाका बासिन्दा हुन्। कञ्चनपुर निर्वाचन क्षेत्र नम्बर २ अन्तर्गत बेदकोट नगरपालिका, शुक्लाफाँटा नगरपालिका र कृष्णपुर नगरपालिका पर्दछन्।
निर्वाचनमा एमाले जिल्ला कमिटी सदस्य, पालिका कमिटी पदाधिकारी, वडा कमिटी अध्यक्षलगायत प्रतिनिधिहरू मतदाता रहेका थिए।
Discussion about this post