वेदकोटमा दोस्रो उप-मेयर कप छात्रा भलिबल प्रतियोगिता सुरु

कञ्चनपुर। वेदकोट नगरपालिकाको आयोजना तथा भुवनेश्वरी माध्यमिक विद्यालय, सिसैयाको संयोजनमा ‘दोस्रो उप-मेयर कप छात्रा भलिबल प्रतियोगिता २०८२’ को भव्य उद्घाटन गरिएको छ। नगर उप-प्रमुख तुलसी जोशीको सभाध्यक्षता तथा नगर प्रमुख भोजराज बोहराको प्रमुख आतिथ्यतामा प्रतियोगिताको उद्घाटन गरिएको हो।

कार्यक्रममा निवर्तमान नगर प्रमुख अशोक कुमार चन्द, निवर्तमान नगर उप-प्रमुख शुशिला सिंह, नगर प्रवक्ता चित्रदेव भट्ट, शिक्षा शाखा प्रमुख पदमराज भट्टसहित वडा अध्यक्षहरू, कार्यपालिका सदस्यहरू, विभिन्न राजनीतिक दलका प्रतिनिधिहरू, शिक्षक-विद्यार्थी लगायत स्थानीय बासीहरूको व्यापक उपस्थिति रहेको थियो।

भुवनेश्वरी मा.वि. सिसैयाका व्यवस्थापन समिति अध्यक्ष प्रवीण बोगटीले उद्घाटन कार्यक्रमको सञ्चालन गर्नुभएको थियो। प्रतियोगितामा नगरपालिकाभित्रका १४ वटा विद्यालयहरूको सहभागिता रहेको छ।

कार्यक्रममा स्वागत मन्तव्य राख्दै शिक्षा शाखा प्रमुख पदमराज भट्टले खेलकुदले विद्यार्थीको अनुशासन र शारीरिक विकासमा टेवा पुऱ्याउने बताउनुभयो। नगर प्रवक्ता चित्रदेव भट्टले नगरको खेलकुद विकासमा यस्ता प्रतियोगिता कोसेढुङ्गा सावित हुने उल्लेख गर्नुभयो।

निवर्तमान नगर प्रमुख अशोक कुमार चन्दले खेलकुद क्षेत्रलाई मर्यादित र प्रतिस्पर्धी बनाउनुपर्नेमा जोड दिनुभयो। उहाँले भन्नुभयो, “जबसम्म खेलकुद क्षेत्रमा व्यावसायिकता र निष्पक्ष प्रतिस्पर्धा हुँदैन, तबसम्म वास्तविक खेलाडीहरूले अवसर पाउँदैनन्। त्यसैले खेल मैदानभित्र खेलाडीहरूले प्रदर्शन गर्ने अनुशासन र मर्यादित व्यवहार नै उनीहरूको सफलताको पहिलो खुड्किलो हो।”

प्रमुख अतिथि तथा नगर प्रमुख भोजराज बोहराले छात्राहरूको लुकेको प्रतिभा प्रस्फुटन गर्न र उनीहरूलाई खेलकुदमा अगाडि बढाउन नगरपालिका सधैं तत्पर रहेको बताउनुभयो। उहाँले खेलकुदको माध्यमबाट छात्राहरूको सशक्तीकरण र उनीहरूको क्षमता अभिवृद्धिमा विशेष लगानी गरिरहेको बताउनुभयो। नगर प्रमुख बोहराले खेलकुद केवल शारीरिक व्यायाम मात्र नभएर नेतृत्व विकासको बलियो आधार भएको चर्चा गर्दै सहभागी १४ वटै विद्यालयका खेलाडीहरूलाई खेल भावनाका साथ प्रतिस्पर्धा गर्न आग्रह गर्नुभयो।

सभाध्यक्ष तथा नगर उप-प्रमुख तुलसी जोशीले महिला सशक्तीकरण र खेल क्षेत्रमा छात्राहरूको नेतृत्व विकासका लागि उप-मेयर कप एउटा महत्त्वपूर्ण मञ्च भएको बताउनुभयो। उहाँले समाजमा महिला र छात्राहरूको आत्मविश्वास बढाउन र उनीहरूलाई मैदानसम्म पुऱ्याउन यो प्रतियोगिताले ठुलो भूमिका खेल्ने विश्वास व्यक्त गर्नुभयो।