कञ्चनपुर । भीमदत्त नगरपालिका वडा नम्बर १३ मा रहेको सामुदायिक विद्यालय श्री सिद्धनाथ माध्यमिक विद्यालय, बडैपुरलाई वडाध्यक्ष रामबहादुर बोहराले खेलाडी जर्सी सहयोग गरेका छन्।
भीमदत्त नगरपालिका स्तरीय १६औँ राष्ट्रपति रनिङ शिल्ड छनोट प्रतियोगिता तथा दोस्रो आधारभूत विद्यालय स्तरीय खेलकुद प्रतियोगितामा सहभागी हुने करिब ३५ जना विद्यार्थी खेलाडीका लागि आवश्यक जर्सी वडा नम्बर १३ को वडा कार्यालयको सहयोगमा उपलब्ध गराइएको हो।
वडाध्यक्ष बोहरासहित वडा सदस्यहरू बालादेवी नाथ, हरिष साउद र फुलपरीले विद्यालयमै पुगेर खेल शिक्षक वीरेन्द्रकुमार थापालाई जर्सी हस्तान्तरण गरेका थिए।
कार्यक्रममा प्रमुख अतिथि रहेका वडाध्यक्ष बोहराले विद्यार्थी खेलाडीहरूलाई अनुशासनका साथ आफ्नो प्रतिभा प्रदर्शन गर्न आग्रह गर्दै, विद्यालयको हितका लागि सधैं साथ रहने प्रतिबद्धता व्यक्त गरे। उनले विद्यालयको युवा नेतृत्वको प्रशंसा गर्दै समूहगत प्रयासमार्फत विद्यालय सुधारका आगामी कार्यक्रमहरूमा हातेमालो गर्ने बताए।
विद्यालयका प्रधानाध्यापक जनकबहादुर चन्दले आन्तरिक कोषको अभावका बीच वडा कार्यालयमार्फत जर्सी उपलब्ध भएपछि प्रतियोगितामा सहभागी हुन सहज भएको बताए।
कार्यक्रमका अध्यक्ष तथा विद्यालय व्यवस्थापन समिति अध्यक्ष महेश भट्टले खेलाडी जर्सी सहयोगका लागि वडाध्यक्ष तथा वडा कार्यसमितिलाई धन्यवाद व्यक्त गरे।
Discussion about this post