कञ्चनपुर — सुदूरपश्चिम विश्वविद्यालय, विज्ञान तथा प्रविधि संकाय अन्तर्गत अब वातावरण विज्ञान तथा व्यवस्थापन (M.Sc. Environmental Science and Management – M.Sc. ESM) विषयमा स्नातकोत्तर तह (एमएस्सी) अध्ययन गर्न पाइने भएको छ। विश्वविद्यालयले शैक्षिक सत्र २०८२ का लागि प्रवेश परीक्षा सञ्चालन तथा भर्ना सम्बन्धी सूचना सार्वजनिक गरेको हो।
सूचना अनुसार, सुदूरपश्चिम विश्वविद्यालयको सामान्य विज्ञान केन्द्रीय विभागमा सेमेस्टर प्रणाली अन्तर्गत उक्त कार्यक्रम सञ्चालन हुनेछ। यसका लागि इच्छुक विद्यार्थीहरूले २०८२ माघ ९ गतेसम्म प्रवेश परीक्षा फाराम बुझाउन सक्नेछन्।
प्रवेश परीक्षा २०८२ माघ १० गते, दिउँसो १२ बजे सञ्चालन हुने जनाइएको छ भने प्रवेश परीक्षाको नतिजा माघ ११ गते प्रकाशित गरिनेछ। सफल विद्यार्थीहरूको भर्ना प्रक्रिया माघ १२ गतेदेखि सम्बन्धित केन्द्रीय विभागले तोकेको अवधिभित्र सम्पन्न गरिनेछ। कक्षाहरू भने पछि प्रकाशित गरिने सूचनाअनुसार सञ्चालन हुनेछन्।
यस कार्यक्रममा अध्ययन गर्न चाहने विद्यार्थीले वातावरण विज्ञान, वातावरण व्यवस्थापन, वातावरणीय/सिभिल इन्जिनियरिङ, वन विज्ञान, कृषि वा कुनै पनि विषयमा विज्ञान संकाय (B.Sc.) बाट स्नातक तह उत्तीर्ण गरेको हुनुपर्नेछ। साथै, सुदूरपश्चिम विश्वविद्यालयले मान्यता दिएको समकक्ष योग्यता सहित न्यूनतम दोस्रो श्रेणी (Second Division) वा सो बराबरको ग्रेड अनिवार्य गरिएको छ। स्थानीय स्तरमै वातावरण, जलवायु परिवर्तन, विपद् जोखिम न्यूनीकरण तथा दिगो विकाससँग सम्बन्धित उच्च शिक्षा अध्ययनको अवसर खुलेपछि सुदूरपश्चिम प्रदेशका विद्यार्थीहरूलाई ठूलो राहत पुग्ने अपेक्षा गरिएको छ।
थप जानकारीका लागि विश्वविद्यालयको वेबसाइट www.fwufost.edu.np वा विज्ञान तथा प्रविधि संकायको केन्द्रीय कार्यालय, महेन्द्रनगर, कञ्चनपुरमा सम्पर्क गर्न सकिनेछ।
Discussion about this post