कञ्चनपुर। कञ्चनपुरको दैजीमा शाखा कार्यालय रहेको किसान बहुउद्देश्यीय सहकारी संस्था लिमिटेडको ३१औं साधारण सभा तथा दैजी इकाई भेला बुधबार सम्पन्न भएको छ। संस्थाका अध्यक्ष सुरेन्द्र कुमार शाहको सभाध्यक्षतामा सम्पन्न कार्यक्रममा वेदकोट नगरपालिका–१० का वडा अध्यक्ष रतन सिंह विष्ट प्रमुख अतिथि रहेका थिए।
कार्यक्रमको सञ्चालन दैजी शाखा प्रमुख अनिल चौधरीले गरेका थिए।
कार्यक्रममा बोल्दै वेदकोट नगरपालिका–१० का वडा अध्यक्ष रतन सिंह विष्टले सहकारी संस्था गाउँको आर्थिक विकास र सामुदायिक सशक्तीकरणको महत्वपूर्ण आधार भएको बताउँदै यसले स्थानीय स्तरमा वित्तीय पहुँच विस्तारमा ठूलो योगदान पुर्याइरहेको उल्लेख गरे। उनले सहकारीले सुरु गरेको सामाजिक र शैक्षिक अभियानले समुदायमा सकारात्मक प्रभाव पारेको पनि बताए।
सभा अध्यक्ष समेत रहेका संस्था अध्यक्ष सुरेन्द्र कुमार शाहले सहकारीको ३१ वर्षको यात्रामा सर्वसाधारणको विश्वास, सदस्यहरुको सक्रियता र व्यवस्थापनको प्रतिबद्धताले सहकारी निरन्तर अघि बढिरहेको बताए। उनले आगामी वर्षमा थप प्रभावकारी सेवा विस्तार गर्ने योजनाबारे पनि जानकारी गराए।
त्यस्तै दैजी शाखा प्रमुख अनिल चौधरीले सहकारीले सञ्चालन गर्दै आएको सेवा, कार्यक्रम र उपलब्धिबारे विस्तृत जानकारी प्रदान गर्दै सदस्यहरुको निरन्तर साथ र सहयोगले नै सहकारी सफल भएको बताए।
सभामा एसईई परीक्षामा उत्कृष्ट नतिजा ल्याउन सफल शेयर सदस्यका छोराछोरीलाई ‘किसान कोप शिक्षा पदक’ प्रदान गरिएको थियो। त्यस्तै उत्कृष्ट शेयर सदस्य र उत्कृष्ट केन्द्रलाई समेत सम्मान गरिएको सहकारीले जनाएको छ।
कार्यक्रममा ठूलो संख्यामा शेयर सदस्य, स्थानीय प्रतिनिधि, सामाजिक अगुवाहरू र आम समुदायको उपस्थिति रहेको सहकारीले जनाएको छ।
Discussion about this post