कञ्चनपुर। सार्क एजुकेसन फाउन्डेसनले कक्षा–११ मा नयाँ भर्ना भएका विद्यार्थीहरूको भव्य स्वागत गरेको छ। कक्षा–१२ का विद्यार्थीहरूको आयोजनामा भएको कार्यक्रमको सभाध्यक्ष कक्षा–१२ का विद्यार्थी अंकित जोशी रहेका थिए।
कार्यक्रमका प्रमुख अतिथि फाउन्डेसनका कार्यकारी निर्देशक डा. लक्ष्मण बस्नेतले नयाँ विद्यार्थीहरूलाई स्वागत गर्दै सफल शैक्षिक यात्राका लागि शुभकामना व्यक्त गरे। उनले सार्क एजुकेसन फाउन्डेसनले शैक्षिक गुणस्तर, मूल्य र अनुशासनलाई प्राथमिकतामा राखेर अघि बढेको उल्लेख गर्दै विद्यार्थीलाई आफ्नो क्षमता पहिचान गरी उत्कृष्टताको खोजीमा लाग्न प्रेरित गरे।
त्यस्तै प्रिन्सिपल सुर्य घिमिरेले कक्षागत शिक्षादेखि व्यवहारिक क्रियाकलापसम्म विद्यार्थीको सम्पूर्ण विकासलाई फाउन्डेसनले विशेष प्राथमिकता दिएको बताए। उनले विद्यार्थीमैत्री वातावरणमा गुणस्तरीय शिक्षा प्रदान गर्ने विद्यालयको प्रतिबद्धता दोहोर्याए।
एकेडेमिक डाइरेक्टर दीपेन्द्र जोशीले विद्यार्थीहरूलाई आफ्नो लक्ष्य स्पष्ट राखेर निरन्तर प्रयास गर्न आग्रह गर्दै शैक्षिक उपलब्धिमा निरन्तरता आवश्यक रहेको बताए।
अंग्रेजी भाषा प्रशिक्षक तथा एचओडी महेन्द्र खड्काले विद्यार्थीहरूलाई भाषिक दक्षता, नेतृत्व क्षमता र प्रस्तुतिकौशल विकासमा विद्यालय सदैव सहयोगी हुने बताएका थिए।
कार्यक्रममा कक्षा–१२ का विद्यार्थीहरूले स्वागत गीत, नृत्य तथा विभिन्न सांस्कृतिक प्रस्तुती दिए। नयाँ भर्ना भएका विद्यार्थीहरूले पनि आत्मपरिचय तथा प्रतिभा प्रदर्शन गर्दै कार्यक्रमलाई झनै आकर्षक बनाएका थिए।
Discussion about this post