कैलालीः धनगढीमा प्रदेश स्तरीय मनसुन समिक्षा तथा हिउँदे प्रकोपको पूर्वतयारीसम्बन्धी अन्तर्क्रिया कार्यक्रम २०८२ सम्पन्न भएको छ। जल तथा मौसम विज्ञान कार्यालय अत्तरियाको आयोजना तथा मर्सिकोर नेपाल, युनिसेफ नेपाल, यूएनडीपी, युरोपियन युनियन, युएन वुमन, हेन्डिक्याप इन्टरनेशनल र नेपाल राष्ट्रिय समाज कल्याण संघ (एनएनएसडब्ल्यूए) को प्राविधिक सहयोगमा उक्त कार्यक्रम सम्पन्न भएको हो।
२०८२ सालको मनसुनपछिको समिक्षा तथा आगामी हिउँदे प्रकोपलाई लक्षित गरी आयोजना गरिएको यस कार्यक्रममा प्रमुख अतिथिका रूपमा आन्तरिक मामिला तथा कानुन मन्त्री हिरा सार्की उपस्थित रहनुभएको थियो। कार्यक्रमको अध्यक्षता जल तथा मौसम विज्ञान कार्यालय अत्तरियाका प्रमुख इन्जिनियर सञ्जय कुमार साहले गर्नुभएको थियो।
अन्तर्क्रियामा सुदूरपश्चिम प्रदेश आन्तरिक मामिला तथा कानुन मन्त्रालय, स्थानीय तह, जल तथा मौसम विज्ञान कार्यालय अत्तरिया साथै नेपाल राष्ट्रिय समाज कल्याण संघ (एनएनएसडब्ल्यूए) लगायतका विभिन्न साँझेदार संघ–संस्थाहरूको सहभागिता रहेको थियो।कार्यक्रममा जल तथा मौसम विज्ञान कार्यालय अत्तरियाका प्रमुख इन्जिनियर सञ्जय कुमार साहले २०८२ सालमा देखिएको मौसमको अवस्थाबारे विस्तृत प्रस्तुति दिँदै प्रदेशमा मनसुनजन्य जोखिमको समीक्षा गर्ने तथा हिउँदे प्रकोपबाट हुन सक्ने क्षति न्यूनीकरणका लागि पूर्वतयारीलाई प्रभावकारी बनाउने उद्देश्यले अन्तर्क्रिया कार्यक्रमको आयोजना गरिएको बताउनुभयो।
प्रदेश विपद् व्यवस्थापन समितिका पाँच वटा क्लस्टरहरूले आ–आफ्ना कार्य तथा अनुभव प्रस्तुत गरेका थिए।
त्यस्तै, स्थानीय तहको तर्फबाट लालझाडी गाउँपालिका, कैलारी गाउँपालिका, भजनी नगरपालिका र धनगढी उपमहानगरपालिकाले विपद् व्यवस्थापनसम्बन्धी आफ्ना अनुभव, चुनौती र सिकाइहरू साझा गरेको नेपाल राष्ट्रिय समाज कल्याण संघ (एनएनएसडब्ल्यूए) र डीसीए नेपालको साँझेदारीमा सञ्चालित सुदृढ परियोजनाका कार्यक्रम संयोजक राज कुमार सुनारले जानकारी दिनुभयो।
कार्यक्रममा बोल्दै नेपाल राष्ट्रिय समाज कल्याण संघ (एनएनएसडब्ल्यूए) का कार्यकारी निर्देशक अशोक बिक्रम जैरूले प्रदेशका सबै निकायहरू पूर्वतयारी अवस्थामा रहेको उल्लेख गर्नुभयो। प्रभावकारी पूर्वतयारीका कारण गत मनसुनमा मानवीय तथा भौतिक क्षति न्यूनिकरण गर्न सकिएको उहाँको भनाइ थियो। उहाँले विपद् जोखिम न्यूनीकरणका लागि सबै निकाय एकजुट भएर काम गर्नुपर्नेमा जोड दिनुभयो।
त्यस्तै, यूएनडीपीका प्रदेश प्रमुख बैजन्ती गिरीले सुदूरपश्चिम प्रदेशमा विपद् जोखिम न्यूनीकरणका लागि यूएनडीपी सदैव प्रतिबद्ध रहेको बताउनुभयो।कार्यक्रममा मौसमविद् अखिलेश चौरसियाले आगामी मौसम पूर्वानुमानसम्बन्धी जानकारी दिनुभएको थियो भने हिउँदे प्रकोपको पूर्वतयारीका विषयमा मौसम विज्ञद्वारा विशेष प्रस्तुति समेत दिइएको थियो।यस अन्तर्क्रिया कार्यक्रमले सुदूरपश्चिम प्रदेशमा मनसुनपछिको अनुभवबाट पाठ सिक्दै हिउँदे प्रकोपको जोखिम न्यूनीकरणका लागि पूर्वतयारीलाई अझ सुदृढ बनाउने विश्वास व्यक्त गरिएको छ।
Discussion about this post