कञ्चनपुर। अपाङ्गता भएका व्यक्तिहरुको ३४ औँ अन्तर्राष्ट्रिय दिवस बुधबार कञ्चनपुरमा विविध कार्यक्रमसहित मनाइएको छ। महेन्द्रनगरको मदनचोकबाट आकर्षक र्याली निकालिँदै सुरु भएको कार्यक्रम भिमदत्त नगरपालिकाको सभा कक्षमा सम्पन्न भएको हो।
कार्यक्रमका प्रमुख आतिथी भीमदत्त नगरपालिकाका प्रमुख प्रशासकीय अधिकृत महेश बम रहनुभएका थिए। दिवसको सफल आयोजनाका लागि वेदकोट नगरपालिका र भीमदत्त नगरपालिकाले आर्थिक सहयोग प्रदान गरेका थिए।
“घर–घरमा, ठाउँ–ठाउँमा अपाङ्गताको पहुँच बनाउँ, सार्वजनिक भौतिक संरचनाहरू अपाङ्गमैत्री बनाऔं, सांकेतिक भाषालाई राष्ट्रिय भाषाको मान्यता दिऔँ” भन्ने नारासहित कार्यक्रम सञ्चालन गरिएको थियो।
कार्यक्रममा बौद्धिक अपाङ्गता अभिभावक संघ कञ्चनपुरका अध्यक्ष शान्ति मल्लले अपाङ्गता भएका व्यक्तिहरुको हक–अधिकार, शिक्षा, स्वाभिमान र पहुँच अभिवृद्धिका विषयमा जोड दिनुभएको थियो। उहाँले स्थानीय तहले अझ प्रभावकारी नीतिगत व्यवस्था तथा अपाङ्गमैत्री वातावरण निर्माण गर्नुपर्ने आवश्यकता औँल्याउनुभयो।
कार्यक्रममा सहभागी विभिन्न संघ–संस्था, अभिभावक, स्वयंसेवी तथा अपाङ्गता भएका व्यक्तिहरुले सामाजिक समावेशीकरण, भौतिक पहुँच र राज्यको सेवा–सुविधामा समान पहुँच सुनिश्चित गर्न राज्य र समाज दुवै जिम्मेवार हुनुपर्ने धारणा राखेका थिए।
Discussion about this post