बैतडी। दशरथचन्द नगरपालिका–४ देवलहाट पछिल्ला वर्षहरूमा धार्मिक, सांस्कृतिक तथा प्राकृतिक पर्यटनको आकर्षक गन्तव्यका रूपमा द्रुत गतिमा विकसित भइरहेको छ। नगरपालिका केन्द्रबाट करिब ३ किलोमिटरको दूरीमै अवस्थित यो क्षेत्र सहज पहुँच, शक्तिपीठहरूको घनत्व र प्राकृतिक सौन्दर्यका कारण आन्तरिक तथा बाह्य पर्यटकको प्रमुख रोजाइ बन्दै गएको छ।
स्थानीय समुदायको निरन्तर प्रयाससँगै यहाँका प्रमुख धार्मिक स्थलहरूको संरक्षण तथा संरचनागत विकास तीव्र भइरहेको छ। पञ्चदेव शिवधाम–सप्तदेवल, शिवकुण्ड, कालभैरव, सहस्त्रलिङ्ग, मालिका, दुर्गाभगवती, बामुनी आमा मन्दिर, बडबाबा (पिजस बुबु) र लटैनाथ बाबा जस्ता शक्तिपीठहरू दैनिक रूपमा भक्तजनको आस्था र विश्वासको केन्द्र बनेका छन्।
विशेषगरी शिवकुण्डमा स्नान तथा सप्तदेवल क्षेत्रको दर्शन गर्न आउने भक्तजनको संख्या वर्षेनि वृद्धि भइरहेको स्थानीयवासीहरूको भनाइ छ। धार्मिक महत्त्वसँगै, यहाँको प्राकृतिक सुन्दरता र जगन्नाथ बाबा भण्डेर क्षेत्र पनि पर्यटकहरूलाई आकर्षित गर्ने प्रमुख गन्तव्यका रूपमा विकसित भइरहेका छन्।
यातायात संरचना सुधारसँगै देवलहाट आउने आगन्तुकहरूको संख्या उल्लेखनीय रूपमा बढेको स्थानीय प्रतिनिधिहरू बताउँछन्। सदरमुकामदेखि छोटो दूरी, सहज सडक सञ्जाल तथा साना सवारी साधनले नै मठ–मन्दिर क्षेत्रसम्म सहजै पुग्न सकिने सुविधा विस्तार भएपछि पर्यटन प्रवद्र्धनमा सकारात्मक प्रभाव परेको देखिन्छ।
स्थानीय समुदायले सञ्चालन गरेको ‘आफ्नो ठाउँ–आफै बनाऔँ’ अभियानले धार्मिक तथा सांस्कृतिक सम्पदाको संरक्षणमा महत्वपूर्ण भूमिका खेलेको छ। समुदाय, स्थानीय सरकार र सरोकारवालाबीचको सहकार्यले देवलहाटलाई निकट भविष्यमा बैतडीको प्रमुख धार्मिक–पर्यटन केन्द्रका रूपमा स्थापित गर्ने विश्वास व्यक्त गरिएको छ।
स्थानीयवासीहरू सबैलाई देवलहाट भ्रमण गर्न आग्रह गर्दै, आस्था, इतिहास र प्रकृति एकै ठाउँमा अनुभव गर्न सकिने अद्वितीय गन्तव्यका रूपमा यस क्षेत्रले आफूलाई स्थापित गर्न सफल भइरहेको बताएका छन्।
Discussion about this post