श्री अमर सामुदायिक वन उपभोक्ता समूहको २५ औं वार्षिक साधारण सभा तथा रजत जयन्ती सम्पन्न

कञ्चनपुर । श्री अमर सामुदायिक वन उपभोक्ता समूहले आफ्नो २५ औं वार्षिक साधारण सभा, रजत जयन्ती तथा सार्वजनिक सुनुवाइ कार्यक्रम सम्पन्न गरेको छ। वन संरक्षण, समृद्धि र समुदायको भूमिकामाथि केन्द्रित कार्यक्रममा उपभोक्ता, स्थानीय प्रतिनिधि तथा सरोकारवाला पक्षहरुको उत्साहपूर्ण सहभागिता रहेको थियो।

कार्यक्रमका प्रमुख अतिथि वेदकोट नगरपालिकाका नगर प्रमुख भोजराज बोहरा रहनुभएको थियो भने, विशिष्ट अतिथि उप–प्रमुख तुलसी जोशी रहनुभएको थियो। श्री अमर सामुदायिक वन उपभोक्ता समूहका अध्यक्ष मोहन बहादुर चन्दको अध्यक्षतामा सम्पन्न कार्यक्रममा उपाध्यक्ष केशब राज भट्टले स्वागत मन्तव्य प्रस्तुत गरेका थिए।

कार्यक्रममा बोल्दै अध्यक्ष मोहन चन्दले सामुदायिक वनको संरक्षणमा उपभोक्ताहरूको निरन्तर प्रयास र प्रतिबद्धता नै समूहको उपलब्धिको आधार रहेको बताए। उनले भने, “जनचेतनाको अभाव, अनुगमनको कमी र ढिलासुस्तीका कारण विगतमा वन विनाश रोक्न नसकिएको हो। तर उपभोक्ताहरूको जागरण, सहभागिता तथा कडाइका उपायले अहिले वन क्षेत्र पुनः हरियाली बन्दै गएको छ।”

त्यस्तै, प्रमुख अतिथि नगर प्रमुख भोजराज बोहराले सामुदायिक वनले स्थानीय स्तरमा जीवनस्तर उकास्न, वातावरण संरक्षण गर्न र आर्थिक क्रियाकलाप बढाउन महत्वपूर्ण भूमिका खेलेको बताए। “वन संरक्षण केवल एउटा कार्यक्रम होइन, यो समुदायको भविष्यसँग जोडिएको जिम्मेवारी हो,” उनले जोड दिए।

विशिष्ट अतिथि नगर उप–प्रमुख तुलसी जोशीले सामुदायिक वन व्यवस्थापनमा महिलाको भूमिका, युवा सहभागिता र वातावरण–अनुकूल नीति आवश्यकताबारे विशेष जोड दिइन्। उनले उपभोक्ता समूहले देखाउँदै आएको सक्रियता आदर्श मुलुकभर फैलिनुपर्ने बताइन्।

कार्यक्रममा श्री अमरज्योति विद्या निकेतन, श्री जनता माध्यमिक विद्यालय तथा श्री बैजनाथ माध्यमिक विद्यालयका विद्यार्थीहरूले आकर्षक सांस्कृतिक प्रस्तुती समेत राखेका थिए। त्यस्तै सामुदायिक वन संरक्षण, व्यवस्थापन र समूहको संस्थागत विकासमा महत्वपूर्ण भूमिका निर्वाह गर्दै आएका व्यक्तित्वहरू, सहयोगी संस्था तथा उदाहरणीय योगदान पुर्‍याउनेहरूलाई सम्मान समेत गरिएको थियो।

दुई दशकअघि चुरे क्षेत्रमा तीव्र वन क्षय, पहिरो, खोला चौडा हुने, बाढीका कारण बस्ती–बस्तुभाउ विस्थापित हुनेजस्ता समस्याले त्रसित बनेपछि २०५७ सालमा श्री अमर सामुदायिक वन उपभोक्ता समूहको स्थापना गरिएको थियो। उपभोक्ताहरूको अथक प्रयास र तत्कालीन जिल्ला वन कार्यालय कञ्चनपुरमा दर्तापछि हाल समूहले वन संरक्षण, सम्बर्धन तथा सदुपयोगमा महत्वपूर्ण उपलब्धि हासिल गरेको छ।

कार्यक्रम सफलतापूर्वक सम्पन्न गर्दै समूहले आउँदा वर्षहरूमा अझ प्रभावकारी संरक्षण, पारदर्शी व्यवस्थापन र सामुदायिक विकासका गतिविधि विस्तार गर्दै लैजाने प्रतिबद्धता व्यक्त गरेको छ।