कञ्चनपुरको वेदकोटमा नागरिक वैज्ञानिक सम्मेलन सम्पन्न: वर्षा मापनमा नागरिकको सक्रिय भूमिकाको प्रशंसा

कञ्चनपुर। कञ्चनपुरको वेदकोट नगरपालिकामा नागरिक वैज्ञानिक सम्मेलन सम्पन्न भएको छ। नगरपालिकामा सञ्चालित स्मार्ट परियोजना अन्तर्गत तालिम प्राप्त गरेका नागरिक वैज्ञानिकहरूले मनसुन अवधिभर संकलन गरेको वर्षाको तथ्यांकको समीक्षा र उनीहरूको योगदानको कदर गर्दै यो सम्मेलन आयोजना गरिएको हो।

स्मार्ट परियोजनाले साउन महिनामा वेदकोट नगरपालिकाका २३ जना नागरिक वैज्ञानिकलाई विशेष तालिम प्रदान गरेको थियो। तालिममा उनीहरूलाई वर्षा गेजको प्रयोग, मापन प्रविधि, तथ्यांक संकलन र प्रतिवेदन प्रणाली बारे विस्तृत जानकारी दिइएको थियो।

कार्यक्रममा नागरिक वैज्ञानिकहरूले मनसुन अवधिभर वर्षाको नियमित निगरानी गरी पठाएको तथ्यांकको समीक्षा गरिएको थियो। आईएचआरआरका कार्यक्रम अधिकृत तथा मौसमविद् आकाश खनालले नागरिक वैज्ञानिकहरूले उपलब्ध गराएको तथ्यांकको गुणस्तर र यसको महत्वमाथि प्रकाश पार्नुभएको थियो।

स्मार्ट परियोजना वेदकोट नगरपालिकामा नेपाल राष्ट्रिय समाज कल्याण संघ (एनएनएसडब्लुए), डिसिए र आइएचआरआर को साझेदारीमा सञ्चालित छ।

डीसीएका निर्देशक दिनेश गरुङले नागरिकको संलग्नतामा आधारित यस्ता परियोजनाले स्थानीय स्तरमा जलवायू परिवर्तनको असर र जोखिम न्यूनीकरणमा महत्वपूर्ण भूमिका खेल्ने बताउनुभयो। उहाँले नागरिक वैज्ञानिकहरूले संकलन गरेको तथ्यांक नीति निर्माण र पूर्व तयारीका लागि अमूल्य रहेको उल्लेख गर्नुभयो।

आईएचआरआरका निर्देशक सुरज गौतमले स्थानीय स्तरबाट प्राप्त वर्षाको तथ्यांकले मौसम विज्ञानको क्षेत्रमा रहेको ‘डाटा ग्याप’ लाई कम गर्न मद्दत पुग्ने विश्वास व्यक्त गर्नुभयो। उहाँले नागरिक वैज्ञानिकहरूको प्रयासलाई संस्थाले थप सहयोग गर्ने प्रतिबद्धता व्यक्त गर्नुभयो।

वेदकोट नगरपालिकाका नगर प्रमुख भोजराज बोहराले नागरिक वैज्ञानिकहरूको सक्रियताको उच्च प्रशंसा गर्नुभयो। उहाँले नागरिकहरूलाई नै वैज्ञानिक बनाउने यो अवधारणा उदाहरणीय रहेको बताउँदै, यसबाट प्राप्त तथ्यांकलाई नगरको विपद् व्यवस्थापन योजनामा समावेश गरिने जानकारी दिनुभयो।

कार्यक्रमको अन्त्यमा, सक्रिय र समर्पित नागरिक वैज्ञानिकहरूलाई उनीहरूको अमूल्य योगदानको कदर गर्दै प्रमाणपत्र प्रदान गरिएको थियो।

त्यस्तै, कार्यक्रममा स्मार्ट परियोजनाका फिल्ड अफिसर बबिता बोहराले तालिम लिएका नागरिक वैज्ञानिकहरूको उत्साह र उनीहरूले जिम्मेवारीपूर्वक वर्षा मापनको काम गरेकोमा धन्यवाद व्यक्त गर्दै परियोजनाको उद्देश्य र हालसम्मको उपलब्धिबारे प्रस्तुति दिनुभएको थियो।