कञ्चनपुर । कञ्चनपुरमा सरकारी प्रतिनिधि तथा जनप्रतिनिधिहरूलाई बौद्धिक अपाङ्गता–सम्बन्धी समावेशी नीतिहरूबारे अभिमुखीकरण गर्न अन्तरक्रिया कार्यक्रम सम्पन्न भएको छ। बौद्धिक अपाङ्गता भएका बालबालिका तथा उनीहरूका अभिभावकहरूको सामाजिक, शैक्षिक तथा व्यक्तिगत विकासमा सहयोग पुर्याउने उद्देश्यसहित कार्यक्रम आयोजित गरिएको हो।
कार्यक्रम लेव इन्क्लुजन डेनमार्कको सहयोग तथा बौद्धिक अपाङ्गता अभिभावक संघ कञ्चनपुरको आयोजनामा ‘किनारादेखि मूलधारसम्म’ योजना अन्तर्गत सम्पन्न भएको थियो।
कार्यक्रममा परियोजनाका फिल्ड अधिकृत नरबहादुर चौधरीले स्वागत मन्तव्य राख्दै ‘किनारादेखि मूलधारसम्म’ परियोजनाको मुख्य उद्देश्य बौद्धिक अपाङ्गता भएका व्यक्तिहरूलाई समुदायमा सार्थक रूपमा समावेश गर्दै समान पहुँच, समान अधिकार र व्यवहारको मान्यता स्थापित गर्नु रहेको बताए। उनले स्थानीय तह, समुदाय तथा परिवारबीचको सहकार्यले मात्र वास्तविक समावेशी वातावरण निर्माण गर्न सकिने उल्लेख गरे।
कार्यक्रमका प्रमुख अतिथी वेदकोट नगरपालिकाका नगरप्रमुख भोजराज बोहराले नगरपालिकाबाट सम्भव हुने सम्पूर्ण सहयोग उपलब्ध गराउने प्रतिबद्धता व्यक्त गर्नुभयो। उहाँले अपाङ्गता भएका बालबालिकालाई विकास, शिक्षा र अवसरमा समान पहुँच दिलाउन स्थानीय तहले अझ सक्रिय भूमिका निर्वाह गर्नुपर्नेमा जोड दिनुभयो। बोहराले योजनालाई प्रभावकारी रूपमा कार्यान्वयन गर्न नगरपालिकाले निरन्तर सहयोग र समन्वय गर्ने आश्वासन पनि दिनुभयो।
त्यस्तै विशिष्ट अतिथी वेदकोट नगरपालिकाकी उपप्रमुख तुलसी जोशीले बौद्धिक अपाङ्गता भएका व्यक्तिहरूको हक–अधिकार, पहुँच र सुरक्षित वातावरण निर्माण राज्य र स्थानीय तह दुवैको दायित्व भएको बताइन्। उनले परिवारको मनोबल, सामुदायिक समर्थन तथा शिक्षा प्रणालीको भूमिका अत्यन्त महत्वपूर्ण रहेको उल्लेख गर्दै समावेशी संरचना विकासमा सबै तहको सहभागिता आवश्यक रहेको धारणा व्यक्त गरिन्।
बौद्धिक अपाङ्गता अभिभावक संघ कञ्चनपुरकी अध्यक्ष शान्ती मल्लले अभिभावकहरूले सामना गर्नुपर्ने चुनौती, सामाजिक सोचमा अझै रहेको विभेद तथा सेवामा पुग्न कठिनाइबारे आफ्नो अनुभव साझा गरिन्। संघले बौद्धिक अपाङ्गता भएका बालबालिकाको क्षमता विकास, शिक्षा, स्वास्थ्य तथा सामाजिक सुरक्षा विस्तारका लागि निरन्तर प्रयास गरिरहेको बताइन्। मल्लले स्थानीय सरकार, समुदाय तथा सरोकारवाला निकायहरू मिलेर काम गर्न सके मात्र यस्ता बालबालिकाको भविष्य उज्यालो बनाउन सकिने बताइन्।
कार्यक्रममा बौद्धिक अपाङ्गता, यसको परिभाषा, पहिचान, कारण, प्रकार तथा विशेषताहरूका बारेमा सुदूरपश्चिम विश्वविद्यालयका उपप्राध्यापक डा. यज्ञराज पाण्डेयले विस्तृत प्रस्तुती समेत दिएका थिए। कार्यक्रमको सञ्चालन संघका सचिव मदन कुवँरले गरेका थिए।
कार्यक्रममा सरोकारवाला निकायका प्रतिनिधि, अभिभावक, स्थानीय तहका अधिकारी तथा समुदायका सदस्यहरूको सहभागिता रहेको थियो। सहभागीहरूले नीतिगत सुधार, पहुँच विस्तार, बालमैत्री सेवा तथा वास्तविक समावेशी अभ्यासका लागि सामूहिक प्रतिबद्धता व्यक्त गरेका छन्।
Discussion about this post