कञ्चनपुरमा बौद्धिक अपाङ्गता भएका बालबालिका तथा व्यक्तिहरूका लागि अध्ययन–अवलोकन कार्यक्रम

कञ्चनपुर। बौद्धिक अपाङ्गता भएका बालबालिका तथा उनीहरूका अभिभावकहरूको लागि सामाजिक, शैक्षिक र व्यक्तिगत क्षमता विकासमा टेवा पुर्‍याउने उद्देश्यले कञ्चनपुरमा ‘किनारादेखि मूलधारसम्म’ योजना अन्तरगत अध्ययन तथा अवलोकन कार्यक्रम सम्पन्न भएको छ।

शनिबार वेदकोट नगरपालिका-४ स्थित धार्मिक स्थल लिङ्गेश्वर धाम मा बौद्धिक अपाङ्गता भएका बालबालिका, उनीहरूका अभिभावक, दौंतरी सहायता समूह र बौद्धिक अपाङ्गताका अभिभावक सङ्घ कञ्चनपुर कार्यसमितिका सदस्यहरू लगायत परियोजनाका कर्मचारीहरूले भ्रमण तथा अवलोकन गरेका छन्।

यो कार्यक्रम बौद्धिक अपाङ्गता सङ्घ कञ्चनपुर ले आयोजना गरेको हो भने यसलाई लेव इन्क्लुजन डेनमार्क को सहयोगमा सञ्चालन गरिएको हो।

संघका अध्यक्ष शान्ति मल्लले गर्दै बौद्धिक अपाङ्गता भएका व्यक्तिहरूको अधिकार र सामाजिक सहभागितामा अभिभावकको भूमिका महत्वपूर्ण रहेको बताउनुभयो। उहाँले यस प्रकारका कार्यक्रमहरूले समुदायमा सचेतना बढाउने र बालबालिकाहरूको सिकाइ तथा सामाजिक अनुकूलनमा मद्दत पुग्ने पनि बताउनुभयो।

भ्रमण कार्यक्रमका क्रममा परियोजनाका फिल्ड अधिकृत नरबहादुर चौधरी र सङ्घका प्रतिनिधिहरूले बौद्धिक अपाङ्गता भएका व्यक्तिहरूको क्षमता विकासका लागि यस्ता कार्यक्रमहरूलाई नियमित रूपमा सञ्चालन गर्ने प्रतिबद्धता व्यक्त गरेका छन्। उहाँहरूले यस्ता अवलोकन तथा अध्ययन भ्रमणहरूले बौद्धिक अपाङ्गता भएका व्यक्तिहरूको सामाजिक, शैक्षिक र व्यक्तिगत क्षमता विकासमा थप योगदान पुर्‍याउने विश्वास व्यक्त गरेका छन्।

बौद्धिक अपाङ्गता अभिभावक सङ्घ कञ्चनपुरमा २०७९ साल माघ २० गते स्थापना भएको हो। प्रारम्भमा संघको छ महिनाको तटस्थ समिति बनेको थियो भने २०८१ साल माघ २८ गते सम्पन्न साधारण सभाबाट स्थायी कार्यसमिति गठन गरिएको थियो। यस कार्यसमितिमा अध्यक्षमा शान्ति मल्ल, सचिवमा मदन कुँवर र कोषाध्यक्षमा चाँदनी जोशी पन्त निर्वाचित भएका थिए।