काठमाडौँ — नेकपा (एमाले)का अध्यक्ष केपी शर्मा ओलीले पार्टी छाडेर गएका नेता तथा कार्यकर्तालाई एमालेमा फर्किन आह्वान गरेका छन्।
नेकपा (एकीकृत समाजवादी)भित्र माओवादी केन्द्रसँग पार्टी एकता गर्नेबारे विवाद भइरहेका बेला ओलीले फरक मत राख्नेहरूलाई सार्वजनिक रूपमा घर फर्कन आग्रह गरेका हुन्।
‘विगतमा नेकपा ९एमाले० निर्माण गर्न र यसलाई बलियो बनाउन सँगै हिँड्नु भएका सबै नेता–कार्यकर्तालाई हृदयदेखि आह्वान गर्न चाहन्छु,’ ओलीले सामाजिक सञ्जालमार्फत लेखेका छन्, ‘जहाँ हुनुहुन्छ, फर्किनुस्, आफ्नै घर फर्किनुस्। यो घर तपाईंहरूको पसिना र रगतले बनेको हो।’
ओलीले एमालेभित्र एकजुट भएर देशको स्वाधीनता, लोकतन्त्रको रक्षा र जनताको जीवनमा आशाको ज्योति बाल्न सकिने बताएका छन्। ‘फेरि हामी सबै काँधमा काँध मिलाएर अघि बढौं, देशको स्वाधीनता जोगाऔं, लोकतन्त्रको रक्षा गरौं र जनताको जीवनमा सुख, समृद्धि र आशाको ज्योति बालौं,’ उनले भनेका छन्।
उनले अझै भनेका छन्, ‘हामी एउटै परिवार हौं। हाम्रो लक्ष्य स्पष्ट छ— समृद्ध नेपाल, सुखी नेपाली। कोही अलमलमा नपर्नुस्, आउनुस्, आफ्नै घरमा फर्किनुस्, हाम्रो साझा सपना साकार पार्न निर्णायक राष्ट्रिय शक्ति निर्माणमा जुटौं।’
ओलीले मुलुकमा देखिएको राजनीतिक संकट समाधानका लागि राष्ट्रिय एकता अपरिहार्य रहेको पनि उल्लेख गरेका छन्। ‘आज फेरि महाविनाश निम्त्याएर देशको सार्वभौम अस्तित्वमाथि चुनौती खडा गरिएको छ, लोकतान्त्रिक संविधानमाथि आक्रमण भइरहेको छ,’ उनले भने, ‘यस्तो बेला हामी मौन रहन सक्दैनौं। राष्ट्रिय एकता, देशको स्वाभिमान र लोकतन्त्रको रक्षाका लागि हामी सबै एकै मन, एकै स्वर र एकै दिशामा अघि बढ्नुपर्छ।’
Discussion about this post