कञ्चनपुर – कञ्चनपुरको उत्थानशील युवा सञ्जालले जिल्ला प्रशासन कार्यालयसंगै भीमदत्त नगरपालिका कार्यालयमा तिहारको अवसरमा विशेष ज्ञापनपत्र पेश गरेको छ। उक्त ज्ञापनपत्रमा मुख्य रूपमा प्लास्टिक फुलमाला र विस्फोटक सामानहरूको नियन्त्रण, स्थानीय प्राकृतिक फुलमालाको प्रवर्द्धन, र पर्यावरणमैत्री तथा सुरक्षित चाडपर्व मनाउने जनचेतना फैलाउने विषयमा आग्रह गरिएको छ।
ज्ञापनपत्रमा उल्लेख गरिएको छ कि पछिल्ला वर्षहरूमा भारत लगायत अन्य मुलुकबाट प्लास्टिकका फुलमालाहरूको अत्यधिक आयात भई बजारमा बिक्री–वितरण भइरहेको छ। यसले स्थानीय कृषक, महिला समूह र फुलखेती व्यवसायीहरूको आम्दानीमा असर पुर्याउने मात्र नभई वातावरणीय प्रदूषण र जल निकास प्रणालीमा अवरोध पनि सिर्जना गर्दै आएको बताइएको छ।
त्यसैगरी, तिहारमा प्रयोग हुने पटाका, झिल्ली जस्ता विस्फोटक पदार्थले बालबालिका र सर्वसाधारणमा शारीरिक चोटपटक, आगलागी र ध्वनि प्रदूषण निम्त्याउने उल्लेख गर्दै, यसका आयात, बिक्री र प्रयोगमा कडाइ गर्न माग गरिएको छ।
ज्ञापनपत्रमा स्थानीय फुलमालाहरूको बिक्री–वितरण सहज बनाउन र स्थानीय उत्पादकलाई प्रोत्साहन गर्न सरोकारवाला स्तरबाट बजार व्यवस्थापन र सहकार्यको आवश्यकता जोड दिएका छन्। साथै, कालोबजारी र अखाद्य बस्तुहरूको आयात तथा बिक्रीबितरणमा अनुगमन र कडाइका साथ कारवाही अघि बढाउनुपर्ने पनि माग गरिएको छ।
उत्थानशील युवा सञ्जालका प्रतिनिधिहरूले भने, “जिल्लाको शान्ति, सुव्यवस्था, स्वास्थ्य र वातावरणीय सन्तुलन कायम राख्न नगरपालिकाले यस अभियानलाई प्राथमिकताका साथ कार्यान्वयन गर्ने विश्वास छ। हामी जिम्मेवार नागरिक र सचेत युवा समाजको नाताले सबैसँग सहकार्य गर्न तत्पर छौं।”
Discussion about this post