पूर्वानुमान र बाढी बुलेटिनअनुसार दोधारा चाँदनीमा बाढीबाट हुने प्रभावितलाई कम्बल र झुल वितरण

कञ्चनपुर । कञ्चनपुरको दोधारा चाँदनी नगरपालिकाका बाढीबाट हुने प्रभावित घरपरिवारलाई गैर खाद्य सामग्री प्रदान गरिएको छ।

दोधारा चाँदनी नगरपालिकाले पूर्वानुमानमा आधारित प्रतिकार्यसम्बन्धी कार्यविधि सक्रिय गरेको र जल तथा मौसम विज्ञान विभाग, मौसम पूर्वानुमान महासाखाले जारी गरेको पूर्वानुमान र बाढी विशेष बुलेटिन अनुसार अझै पनि पानी पर्ने सम्भावना रहेको साथै महाकाली र जोगबुडा नदीमा बाढीको उच्च जोखिम रहेको हुँदा प्रभावित परिवारहरूले केही दिनसम्म सुरक्षित आश्रयस्थलमा बस्नुपर्ने भएकाले उनीहरूलाई कम्बल र झुललगायत गैर खाद्य सामग्री वितरण गरिएको हो।

नेपाल राष्ट्रिय समाज कल्याण संघ (एनएनएसडब्ल्यूए) र डीसीएले दोधारा चाँदनी नगरपालिकासँगको समन्वयमा बाढीबाट प्रभावित भई जनज्योती माध्यमिक विद्यालयमा बसेका वडा नम्बर ७ रामपुरे टापु र वडा नम्बर ८ जर्काटोलका बाढी प्रभावित र अम्बिका माध्यमिक विद्यालयमा बसेका वडा नम्बर १० शान्ति टोलका बाढी प्रभावित परिवारहरूलाई कम्बल र झुललगायत गैर खाद्य सामग्री वितरण गरेका हो। यसअघि सम्पन्न स्थानीय विपद् व्यवस्थापन समितिको आपतकालीन बैठकले सरोकारवालाहरूसँगको सहकार्यमा सुरक्षित आश्रयस्थलहरू व्यवस्थापन गर्ने निर्णय गरेको थियो।

सोही आधारमा, एनएनएसडब्ल्यूए र डीसीएको साझेदारीमा सञ्चालित सुदृढ परियोजनाले मनसुन सुरू भएलगत्तै अनुबन्ध करार सम्झौतामार्फत जोखिममा रहेका बस्तीहरूमा सामूहिक नगद सहायता वितरण गरिसकेको छ। उक्त सहयोगले सुरक्षित आश्रयस्थलहरू व्यवस्थापन गर्न र प्रभावित परिवारहरूको खानाको व्यवस्थापनमा सहजता भएको सामुदायिक विपद् व्यवस्थापन समितिहरूको भनाई रहोको छ।

गत तीन दिन देखि परेको अविरल वर्षापछि आएको बाढीबाट दोधारा चाँदनी नगरपालिकाका १५७ घर परिवार विस्तापित भएका थिए। तिमध्ये केही विद्यालयमा र केही आफन्तको घरमा आश्रय लिएर बसेका छन् भने केही आफ्नो घरमा फर्किएका छन्।

नेपाल राष्ट्रिय समाज कल्याण संघ (एनएनएसडब्ल्यूए) का कार्यकारी निर्देशक अशोक बिक्रम जैरूले दोधारा चाँदनी नगरपालिका प्रत्येक वर्ष बाढीबाट प्रभावित हुँदै आएको बताउनुभयो। अहिले पनि धेरै परिवारहरू विद्यालयमा आश्रय लिएर बस्न बाध्य भएको उल्लेख गर्दै उहाँले प्रभावित परिवारलाई राति सुत्नका लागि आवश्यक कम्बल र झुलको अभाव रहेकाले नगरपालिकाको समन्वयमा तत्काल सामग्री वितरण गरिएको जानकारी दिनुभयो। उहाँले बाढीपछिको अवस्थाले विभिन्न रोगको जोखिम बढाउन सक्ने भएकाले सुरक्षा र स्वास्थ्यलाई मध्यनजर गर्दै गैर खाद्य सामग्री उपलब्ध गराइएको स्पष्ट पार्नुभयो। स्वच्छता पनि उतिकै महत्वपूर्ण भएको भन्दै उहाँले प्रभावितहरूका लागि हाईजनिक किटको व्यवस्थापन गर्न पहल गर्ने बताउनुभयो।

दोधारा चाँदनी नगरपालिकाका नगर प्रमुख किशोर कुमार लिम्बुले बाढी प्रभावित परिवारहरूको तात्कालिन आवश्यकता पूरा गर्न गैर खाद्य सामग्री वितरण गरिएको बताउनुभयो। उहाँले हरेक वर्ष बाढीका कारण स्थानीयवासी प्रभावित हुने अवस्था दोहोरिरहेकाले नगरपालिका सतर्क रहँदै आएको बताउनुभयो। उहाँले विपद् व्यवस्थापन समितिको सक्रियता र सरोकारवालाको सहकार्यले सुरक्षित आश्रयस्थल व्यवस्थापनदेखि प्रभावित परिवारलाई आधारभूत आवश्यकता पूरा गर्न सहज भएको बताउनुभयो।सुदूरपश्चिम प्रदेश सभा सदस्य बेल बहादुर राना मगरले विगत तीन दिनदेखि परेको अविरल वर्षाका कारण धेरै परिवार प्रभावित भएको बताउनुभयो। उहाँले प्रभावित परिवारहरूको सहायतामा स्थानीय सरकार र सरोकारवाला संस्थाहरूले अग्रसरता देखाउनुपर्नेमा जोड दिनुभयो।

नेपाल राष्ट्रिय समाज कल्याण संघ (एनएनएसडब्ल्यूए) का कार्यक्रम संयोजक राज कुमार सुनारले विद्यालयमा आश्रय लिएका वृद्धवृद्धा र गर्भवती महिलासहितका प्रभावित परिवारलाई बस्न असहज भएको अवस्थालाई मध्येनजर गरि सुरक्षा, स्वास्थ्य र सहजताका लागि सामग्री वितरण गरिएको बताउनुभयो।

दोधारा चाँदनी नगरपालिका वडा नम्बर ८ ट्वालट्वाले सामुदायिक विपद् व्यवस्थापन समितिका अध्यक्ष टिका देवी मगरले धेरै परिवारहरू विद्यालयमा आश्रय लिएर बसेको र उनीहरूलाई राति सुत्न कम्बल र झुलको अभाव रहेको अवस्थामा एनएनएसडब्ल्यूए र डीसीएको सहयोगमा सामग्री वितरण गरिएकोले ठूलो राहत पुगेको बताउनुभयो।