कञ्चनपुर । हिन्दु नारीहरूको महान पर्व हरितालिका तीज एवम् ऋषि पञ्चमीको पावन अवसरमा कञ्चनपुरको भीमदत्त नगरपालिका वडा नम्बर ११ मा भव्य कार्यक्रमको आयोजना गरिने भएको छ।
यस वर्ष सोही वडामा रहेको श्री रामेश्वर मन्दिर भुजेलामा दुई दिनसम्म विशेष कार्यक्रम हुने भएको हो।गत वर्ष पनि वडा कार्यालयले यस क्षेत्रमा सफलतापूर्वक तीजको कार्यक्रम आयोजना गरेको थियो, जसमा स्थानीय महिलाहरूको उल्लेख्य सहभागिता रहेको थियो।
यस वर्ष पनि उक्त परम्परालाई निरन्तरता दिँदै भीमदत्त नगरपालिका-११ को आयोजना तथा श्री रामेश्वर मन्दिर समिति भुजेलाको सहकार्यमा भदौ १० गते हरितालिका तीज र भदौ १२ गते ऋषि पञ्चमीको दिन विशेष कार्यक्रम हुने भएको छ।
कार्यक्रमबारे जानकारी दिँदै भीमदत्त नगरपालिका-११ का वडा अध्यक्ष प्रकाश थापाले तीज हिन्दु महिलाहरूको संस्कृति र परम्परासँग जोडिएको महत्वपूर्ण पर्व भएको बताए। उनले भने, “यस पर्वले महिलाहरूलाई एकताबद्ध भई आफ्ना सुखदुःख साट्ने अवसर प्रदान गर्दछ। हाम्रो वडा कार्यालयले यस्ता धार्मिक र सांस्कृतिक कार्यक्रमहरूको आयोजना गरेर परम्परालाई जोगाउनुका साथै महिला सशक्तीकरणमा समेत योगदान पुर्याउने लक्ष्य राखेको छ।”
यस वर्षको कार्यक्रममा सांस्कृतिक पर्वको रौनकका साथै सरसफाइलाई पनि विशेष प्राथमिकता दिइएको छ। कार्यक्रम हुनुअघि मन्दिर परिसर र त्यस वरपरको क्षेत्रमा सरसफाइ गरिएको छ। सरसफाइ कार्यक्रममा भुवनेश्वरी मावि गड्डाचौकी, शसस्त्र प्रहरी तथा नेपाल प्रहरीले समेत सहयोग गरेको थियो।
अध्यक्ष थापाले गत वर्षको कार्यक्रमबाट उत्साहित भएर यस वर्ष पनि अझ भव्य र व्यवस्थित तरिकाले कार्यक्रमको तयारी भइरहेको बताए। उनले सम्पूर्ण दिदीबहिनीहरूलाई दुवै दिनका कार्यक्रममा सहभागी भई यस पर्वलाई थप उल्लासमय बनाइदिन आग्रह पनि गरेका छन्। साथै उहाँले महाकाली नदीमा स्नान आउने श्रद्धालु भक्तजनहरूको सुरक्षाका निम्ति सम्पूर्ण व्यवस्था मिलाइएको बताउनुभयो।
कार्यक्रमको मुख्य उद्देश्य धार्मिक र सांस्कृतिक महत्वलाई प्रवर्द्धन गर्नुका साथै वडाका महिलाहरूबीच सद्भाव र एकता बढाउनु रहेको छ।
Discussion about this post