कञ्चनपुर । सुदूरपश्चिमको अग्रणी शैक्षिक संस्था जनज्योति बहुमुखी क्याम्पस आफ्नो स्थापनाको २५ औं वर्षमा प्रवेश गरेको छ।
कञ्चनपुरको भीमदत्त नगरपालिका–१८, भासीमा रहेको यस क्याम्पसले वि.सं. २०५८ सालमा स्थापना भएदेखि नै न्यून शुल्कमा गुणस्तरीय शिक्षा प्रदान गर्दै आएको छ।
क्याम्पसका प्रमुख प्रकाश दत्त जोशीले दक्ष जनशक्ति उत्पादनमा क्याम्पसले विशेष जोड दिएको बताउनुभयो। उहाँले क्याम्पसले विद्यार्थीहरूको सर्वाङ्गीण विकासका लागि शैक्षिक र अतिरिक्त क्रियाकलापलाई सँगसँगै अगाडि बढाएको जानकारी दिनुभयो।
जनज्योति बहुमुखी क्याम्पसले हरेक वर्ष आफ्नो स्थापना दिवसको अवसरमा सामाजिक कार्य गर्दै आएको छ। गत वर्ष महेन्द्रनगरस्थित समाज कल्याण अञ्चल बाल अनाथालयलाई रु. २५,१२५ सहयोग गरेको थियो भने यस वर्ष क्याम्पसले रक्तदान कार्यक्रम आयोजना गरी स्थापना दिवस मनाएको छ।
क्याम्पसले विद्यार्थीलाई नियमित शैक्षिक भ्रमण, अतिरिक्त क्रियाकलाप र खेलकुद सप्ताहमा सहभागी गराएर उनीहरूलाई पढाइका साथै अन्य क्षेत्रमा पनि सक्रिय बनाउँदै आएको छ।
जनज्योति एजुकेसनल फाउन्डेसनद्वारा सञ्चालित जनज्योति बहुमुखी क्याम्पस र जनज्योति माध्यमिक विद्यालयमा हाल २,९०० भन्दा बढी विद्यार्थी अध्ययनरत छन्। क्याम्पसमा १०० भन्दा बढी प्राध्यापक, शिक्षक तथा कर्मचारी कार्यरत छन्।
क्याम्पसले स्नातक तहमा बिसिए, बीबीएस, बिएड, बिएसडब्लु र बिएका साथै स्नातकोत्तर तहमा एमबिएस, एमए र एमएडको पढाइ सञ्चालन गरिरहेको छ। यस्तै, जनज्योति माध्यमिक विद्यालयमा कक्षा ११ र १२ मा व्यवस्थापन, शिक्षा र कानुन विषयको पढाइ हुने गरेको छ।
क्याम्पसले आफ्नो भौतिक पूर्वाधारमा पनि सुधार गर्नुका साथै नयाँ व्यवस्थापनका साथ स्नातक तहका विभिन्न संकायमा भर्ना आह्वान गरेको छ।
Discussion about this post