कञ्चनपुर – नेपाल राष्ट्रिय शिक्षक सङ्गठन जिल्ला महिला विभागको आयोजनामा हरितालिका तीज विशेष कार्यक्रम र माध्यमिक शिक्षा परीक्षा (एसईई) २०८१ मा उत्कृष्ट जीपीए ल्याउने विद्यार्थीहरूलाई सम्मान कार्यक्रम सम्पन्न भएको छ । कञ्चनपुरको बेलौरीस्थित सिद्धार्थ रिसोर्टमा भएको यस कार्यक्रममा जिल्लाभरका १० जना प्रतिभाशाली विद्यार्थीहरूलाई नगद र सम्मानपत्रसहित अभिनन्दन गरिएको हो ।
नेपाल राष्ट्रिय शिक्षक सङ्गठनका जिल्ला अध्यक्ष उत्तम विष्टले कार्यक्रमको मुख्य उद्देश्य सामुदायिक विद्यालयबाट एसईईमा उच्चतम जीपीए हासिल गर्ने विद्यार्थीहरूलाई प्रोत्साहन गर्नु रहेको बताउनुभयो। उहाँले भन्नुभयो “सामुदायिक विद्यालयबाट उत्कृष्ट नतिजा ल्याउने विद्यार्थीहरूलाई सम्मान गर्दा उनीहरूमा थप ऊर्जा र प्रेरणा मिल्छ । यसले अन्य विद्यार्थीहरूलाई पनि राम्रो गर्न प्रोत्साहित गर्छ । हामीले शिक्षाको गुणस्तर सुधार गर्न र विद्यार्थीहरूको भविष्य उज्ज्वल बनाउन निरन्तर काम गरिरहनेछौँ ।”
सम्मानित हुने विद्यार्थीहरूमा भीमदत्त नगरपालिकाबाट महेन्द्रनगर माविका हेमन्त पाण्डेय र ग्रिष्म अवस्थीले ३.९५ जीपीए, पुनर्वास नगरपालिकाबाट सरस्वती माविकी अपेक्षा लामिछानेले ३.९६ जीपीए, शुक्लाफाटा नगरपालिकाबाट राष्ट्रिय माविकी ईश्वरी जोशीले ३.८० जीपीए र बेदकोट नगरपालिकाबाट भुवनेश्वरी माविकी भुवनेश्वर पन्तले ३.७८ जीपीए हासिल गरेका छन् ।
त्यसैगरी, कृष्णपुर नगरपालिकाबाट राष्ट्रिय माविकी प्रियांशु लुहारले ३.७४ जीपीए, बेलडाडी गाउँपालिकाबाट रौलेश्वर माविका दिपेश खातीले ३.६५ जीपीए, लालझाडी गाउँपालिकाबाट सरस्वती माविका विजय चौधरीले ३.५० जीपीए, बेलौरी नगरपालिकाबाट लक्ष्मी माविकी रोशनी खनालले ३.८७ जीपीए र दोधाराचाँदनी नगरपालिकाबाट लक्ष्मी माविका सुवर्ण रावतले ३.४६ जीपीए प्राप्त गरेका छन् ।
सम्मानित विद्यार्थीहरूलाई जनही १,१०५ रुपैयाँ, प्रशंसा पत्र, खादा र टीका प्रदान गरी सम्मान गरिएको आयोजकले जानकारी दिएको छ।
नेपाल राष्ट्रिय शिक्षक सङ्गठन जिल्ला महिला विभागको आयोजनामा सम्पन्न उक्त कार्यक्रमको अध्यक्षता विभागकी संयोजक सत्या रोकायाले गर्नुभएको थियो । कार्यक्रममा प्रमुख अतिथि नेपाल राष्ट्रिय शिक्षक सङ्गठन राष्ट्रिय समितिकी सदस्य धनमती बिष्ट र विशिष्ट अतिथि राष्ट्रिय समिति सदस्य हरि प्रसाद रिजाल रहनुभएको थियो।
त्यस्तै बेलौरी नगरपालिका वडा नम्बर -४ का वडाध्यक्ष अर्जुन ढकाल, पेसागत महासंघ नेपालका केन्द्रीय सदस्य जयन्ती पन्त लगायतको समेत कार्यक्रममा उपस्थिति रहेको आयोजकले जनाएको छ। कार्यक्रममा नर्मदा कलौनी जोशीले स्वागत मन्तव्य राख्नुभएको थियो ।
Discussion about this post