कञ्चनपुर । नेपाल राष्ट्रिय समाज कल्याण संघ (एनएनएसडब्ल्यूए) को २६ औँ वार्षीक साधारण सभा सम्पन्न भएको छ। ‘समतामुलक समाजका लागि हातेमालो गरौँ’ भन्ने मुल नाराका साथ शुक्रबार एनएनएसडब्ल्यूए केन्द्रीय कार्यालयमा संस्थाको वार्षीक साधारण सभा सम्पन्न भएको हो। संस्थाका अध्यक्ष माया देवी सार्कीको सभापतित्वमा सम्पन्न भएको कार्यक्रममा प्रमुख अतिथि सुदूरपश्चिम प्रदेश सभा सदस्य मधु भारती रहनुभएको थियो।
कार्यक्रमलाई सम्बोधन गर्दै संस्थापक अध्यक्ष तथा कार्यकारी निर्देशक अशोक बिक्रम जैरूले संस्थाले समतामूलक समाजको अवधारणालाई आत्मसात गरि दलित, अपाङ्गता भएका व्यक्तिहरु र पछाडी परेका समुदायहरूलाई उत्थानशील बनाउन विभिन्न सामुदायिक विकास तथा मानवीय सेवाहरूका लागि काम गर्दै आएको बताउनुभयो।
उहाँले विगत ३५ वर्षदेखि आरक्षपिडित, मूक्तकमैया, मूक्तकमलहरी, महिला, बालबालिका, एचआईभी संक्रमित र कुष्ठरोग प्रभावित व्यक्तिहरुका लागि सुदूरपश्चिम, लुम्बिनी र कर्णाली प्रदेशमा कार्यरत रहि सेवा प्रदान गर्दै आईरहेको बताउनुभयो। स्थानीय, प्रदेश तथा संघीय सरकारसँग समन्वय तथा कार्यगत सहकार्य गरि आवश्यकता अनुसार प्राविधिक सहयोगहरु दिने तथा लिने कार्यहरु नियमित रूपमा भैरहेको उहाँले बताउनुभयो।
कार्यक्रमका प्रमुख अतिथि सुदूरपश्चिम प्रदेश सभा सदस्य मधु भारतीले एनएनएसडब्ल्यूएले सुदूरपश्चिममा मात्रै नभएर अहिले देश भरिमै सामाजिक क्षेत्रमा बेग्लै पहिचान बनाएको बताउनुभयो। उहाँले सुदूरपश्चिम प्रदेशको विकासका लागि संस्थाले गरेको कार्य प्रशंसा गर्दै संस्थालाई प्रदेश सरकारबाट आवश्यक सहयोगको लागि पहल गर्ने प्रतिवद्धता समेत व्यक्त गर्नुभयो।
कार्यक्रममा संस्थाका महासचिव रूपा कौशल परियारले संस्थाको वार्षीक प्रगति प्रतिवेदन पेश गर्नुभएको थियो। त्यसैगरी कोषाध्यक्ष कबिता भट्टले आर्थिक वर्ष २०७८१/८२ को आय-व्यय सहितको वार्षिक बजेट विवरण प्रतिवेदन पेश गर्नुभएको थियो। कोषाध्यक्ष भट्टले चालु आर्थिक वर्ष २०८३/८३ लागि अनुमानित बजेट प्रस्तुत गर्नुभयो।
संस्थाका सचिव सुरेश परियारले सञ्चालन गरेको कार्यक्रममा कार्य समिति पदाधिकारी तथा सदस्यहरू, साधारण सदस्यहरू, संस्थाका कर्मचारीहरू, विभिन्न संघसंस्थाका प्रतिनिधिहरू, पत्रकार साथै समाजसेवी तथा बुद्धिजीहरूको उपस्थिति रहेको थियो। कार्यक्रममा संस्थाका अध्यक्ष माया देवी सार्की र कार्यसमिति सदस्य बबिता सुनार, कार्यक्रम संयोजक देवराज बडु र आरती सुनारले मन्तव्य राख्नुभएको थियो।
कार्यक्रममा कार्यसम्पादनको उच्च मूल्याङ्क गर्दै कर्मचारी गम्भिरलाल उराव संस्थाको सर्वोत्कृष्ट कर्मचारी २०२५ बाट सम्मानित हुनुभएको छ। उहाँललाई प्रमाण पत्र सहित नगद रु ११ हजार प्रदान गरिएको छ। वार्षीक साधारण सभाको अवसरमा सडक छेउमा वृक्षारोपण समेत गरिएको छ।
Discussion about this post