कञ्चनपुर । सरकारले ल्याउन लागेको विद्यालय शिक्षा ऐनका केही बुँदामा असहमति जनाउँदै देशभरका निजी विद्यालय सञ्चालकहरू आन्दोलित भएका छन्। यसै क्रममा कञ्चनपुरमा पनि निजी विद्यालयहरूको साझा संगठन प्याब्सन र एनप्याब्सनले संयुक्त रूपमा आन्दोलनका कार्यक्रमहरू सुरु गरेका छन्।
आन्दोलनको पहिलो दिन कञ्चनपुरका ९ वटै पालिकाका प्रमुख र शिक्षा शाखाका प्रमुखलाई ज्ञापनपत्र बुझाइएको छ। प्याब्सन कञ्चनपुरका अध्यक्ष महादेव भट्टले केन्द्रीय कार्यक्रमअनुसार नै यो काम गरिएको बताए। उनले आगामी दिनमा पनि आन्दोलन जारी रहने र विद्यालय नै बन्द गर्नुपर्ने अवस्था नआओस् भन्ने चाहेको उल्लेख गरे।
एनप्याब्सन कञ्चनपुरका अध्यक्ष सत्येशबहादुर चन्दले सरकारले निजी विद्यालयमाथि अन्याय गरेकोले आन्दोलनमा उत्रिन बाध्य भएको बताए।
निजी विद्यालय सञ्चालकहरूले विधेयकमा समावेश गरिएका केही बुँदामा मुख्य रूपमा असहमति जनाएका छन्। उनीहरूका अनुसार निजी विद्यालयलाई क्रमशः गैरनाफामूलक बनाउने प्रावधान, ‘पूर्ण छात्रवृत्तिको व्यवस्था, हाल अभ्यासमा रहेको कुल विद्यार्थी संख्याको १० प्रतिशत छात्रवृत्ति दिने प्रावधानलाई निरन्तरता दिनुपर्ने माग र छात्रवृत्ति अन्तर्गत भर्ना शुल्क, वार्षिक शुल्क तथा मासिक पढाइ शुल्क पनि कायम गरिनुपर्ने बुँदाहरूले निजी विद्यालयमाथि अन्याय हुने देखिएको छ। प्याब्सन भीमदत्त नगरका अध्यक्ष उपेन्द्रप्रसाद जोशीले यी बुँदाहरू नसच्याएसम्म आन्दोलन जारी राख्ने बताए।
निजी विद्यालयका सञ्चालकहरूले ज्ञापनपत्र बुझाउने र अन्तर्क्रिया गर्ने लगायतका कार्यक्रमहरू तय गरेका छन्। यदि यी कार्यक्रमबाट पनि माग पूरा नभएमा विद्यालय बन्द गर्ने लगायतका कडा कदम चाल्ने चेतावनी दिएका छन्। यस आन्दोलनमा प्याब्सनका पूर्व केन्द्रीय उपाध्यक्ष प्रेम ब. चन्द र प्याब्सन जिल्ला सदस्य देवराज जोशीको पनि समर्थन रहेको छ। उनीहरूले आन्दोलनको औचित्यमाथि थप जोड दिँदै निजी विद्यालयहरूलाई सरकारले थप संकटमा पार्न लागेको तर्क गरेका छन्।
यस क्रममा साउन ३० गते जिल्ला प्रशासन कार्यालय, शिक्षा विकास तथा समन्वय एकाइ र जिल्ला समन्वय समितिको कार्यालयमा ज्ञापनपत्र बुझाइनेछ। त्यसैगरी, भाद्र १ गते प्रदेशमा मुख्यमन्त्री र सामाजिक विकास मन्त्रालयलाई ज्ञापनपत्र बुझाइनेछ। भाद्र २ गते आ-आफ्नो निर्वाचन क्षेत्रका संघीय सांसदहरूलाई ज्ञापनपत्र बुझाइने कार्यक्रम छ।
साथै, भाद्र ६ र ७ गते केन्द्र र प्रदेश स्तरमा सरोकारवालाहरूसँग अन्तर्क्रिया गरिनेछ। यसबाहेक आन्दोलनलाई थप सशक्त बनाउन भाद्र २ गते राष्ट्रिय परिषद्को जुम बैठक बस्ने र हरेक पालिकामा पालिकास्तरीय समितिको आन्दोलन तयारी बैठक बस्ने कार्यक्रम पनि तय भएको छ। यसैगरी भाद्र ४ गते जिल्लास्तरीय र भाद्र ५ गते प्रदेशस्तरीय समितिको आन्दोलन तयारी बैठक बस्ने जनाइएको छ।
Discussion about this post