कञ्चनपुर । कञ्चनपुरको वेदकोट नगरपालिका -६ सिसैयास्थित भुवनेश्वरी माध्यमिक विद्यालयको कक्षा १२ को नतिजा सुधार भएको छ। विद्यालयका १४२ विद्यार्थीमध्ये ७६ जना उत्तीर्ण भएका छन्।
परिक्षामा व्यवस्थापन संकायकी मनिसा भुलले सबैभन्दा बढी ३.४२ जीपीए ल्याएर विद्यालयकै उत्कृष्ट नतिजा हासिल गरेकी छन्।
विद्यालयका प्रधानाध्यापक रणबहादुर दौल्यालले नतिजा सुधारका लागि अतिरिक्त कक्षा सञ्चालन गरिएको जानकारी दिँदै विगतको तुलनामा यस वर्षको नतिजा सन्तोषजनक रहेको बताएका छन्।
विद्यालय व्यवस्थापन समितिका अध्यक्ष प्रविन बोगटीले विद्यालयको शैक्षिक र भौतिक सुधारलाई आफ्नो प्रमुख प्राथमिकतामा राखेको बताए। “हामीले विद्यालयको शैक्षिक गुणस्तर बढाउनुका साथै भौतिक पूर्वाधार सुधार गर्न विभिन्न योजनाहरू बनाएका छौँ,” बोगटीले भने। “यसलाई साकार पार्न हामी सबै मिलेर अगाडि बढेका छौँ। भुवनेश्वरी माविलाई यो क्षेत्रकै उत्कृष्ट विद्यालय बनाउने हाम्रो लक्ष्य छ।”
सुदूरपश्चिम प्रदेश सरकारले नमूना विद्यालयका रूपमा छनोट गरेको भुवनेश्वरी माविमा पछिल्लो समय विद्यार्थीको संख्या पनि बढ्दै गएको छ। हाल विद्यालयमा करिब ८०० विद्यार्थी अध्ययनरत छन्। यसअघि २०८१ सालको एसईई परीक्षामा पनि यस विद्यालयले वेदकोट नगरपालिकामै उत्कृष्ट नतिजा ल्याएको थियो।
Discussion about this post