काठमाडौँ । मिडिया काउन्सिलमा अनलाइन टिभी पत्रकारहरुको प्रतिनिधित्व सुनिश्चित गर्न अनलाइन टिभी पत्रकार संघ, नेपालले माग गरेको छ ।
काउन्सिल सम्बन्धी विधेयकमा छलफल चलाएरहेको संघीय संसदको शिक्षा, स्वास्थ्य तथा सूचना प्रविधि समितिका सभापति अम्मरबहादुर थापालाई सुझावपत्र बुझाउदै संघले प्रतिनिधित्वको माग गरेको हो ।
विधेयकको दफा ६ घ मा छापा, अनलाईन, रेडियो र टेलिभिजनका प्रकाशक, सम्पादक, श्रमजीवी पत्रकारहरुको प्रतिनिधित्व हुने व्यवस्था गरिएपनि अनलाइन टिभीलाई भने बेवास्ता गरिएको भन्दै संघले समितिको ध्यानाकर्षण गराएको हो ।
संघको तर्फबाट अध्यक्ष जीवन भण्डारी नेतृत्वको टोलीले सभापति थापालाई सिंहदरवारस्थित कार्यकक्षमै भेटेर पछिल्लो समयमा सबैभन्दा बढी प्रभावकारी भएका र संख्याको हिसावले पनि सबैभन्दा धेरै रहेका अनलाइन टिभीहरुको प्रतिनिधित्व काउन्सिलमा हुनुपर्ने माग राखेको हो ।
अहिलेको प्रेस काउन्सिलमा पनि सबैभन्दा धेरै विवाद र उजुरी अनलाइन टिभीकै बारेमा पर्ने गरेकाले पनि त्यसको सम्वोधन गर्न र न्यूनीकरण गर्न काउन्सिलमा अनलाइन टिभीको प्रतिनिधित्व हुनु पर्ने अध्यक्ष भण्डारीको भनाई थियो ।
उनले परम्परागत मिडियाबाट प्रतिनिधित्व गर्नेहरुले नयाँ मिडियाको समस्या सम्बोधन गर्न नसक्ने र प्राविधिक हिसाबले पनि काउन्सिलमा अनलाइन टिभीका बारेमा जानेको व्यक्ति अत्यावश्यक भइसकेको तर्क गरे ।
संघको तर्फबाट सभापति थापालाई दिएको सुझावपत्रमा लेखिएको छ, “काउन्सिलमा सबैभन्दा धेरै उजुरी पर्ने, सबैभन्दा धेरै विकास हुदै गएको र सबैभन्दा धेरै प्रभावशाली हुदै गएको अनलाइन टिभीको प्रतिनिधित्व अनिवार्य हुुनुपर्दछ । माध्यम अनुसारको समावेशी प्रतिनिधित्वसँगै प्राविधिक, व्यवहारिक र न्यायोचित दृष्टीकोणले पनि काउन्सिलमा अनलाइन टिभीको प्रतिनिधित्व आवश्यक छ ।”
प्रेस काउन्सिलकै अघिल्लो वर्षको विवरण अनुसार देशभरी नियमित प्रकाशित सबै प्रकारका पत्रिकाको संख्या ७७९ रहेको, प्रसारण अनुमति लिएका रेडियोको संख्या एक हजार १९२ र टिभीको संख्या २४६ रहेकोमा अनलाइनको संख्या ४ हजार ६२२ र अनलाइन टिभीको संख्या त्यो भन्दा धेरै रहेको अध्यक्ष भण्डारीको दाबी छ ।
घट्दै गएका सञ्चार माध्यमको भन्दा बढ्दै गएका सञ्चार माध्यमको प्रतिनिधित्व बढी हुनु पर्ने बताउँदै उनले अनलाइन टिभीको प्रतिनिधित्वको व्यवस्था नभएमा काउन्सिलमा व्यवहारिक समस्या हुने र काउन्सिल नै असान्दर्भिक हुने बताए । उनले अनलाइन टिभी बढी प्राविधिक र नयाँ माध्यम भएकाले त्यसलाई हेर्न छुट्टै पूर्णकालीन निर्देशकको पनि व्यवस्था गर्नुपर्नेमा जोड दिए ।
काउन्सिल आफैँले र पत्रकार महासंघले हालै अनलाइन टिभीलाई पत्रकारिताको दायरामा ल्याएर व्यवस्थित गर्दै जिम्मेवार बनाउनु पर्ने निर्णय गरेकाले पनि काउन्सिलमा अनलाइन टिभीको प्रतिनिधित्व स्वभाविक भएको अध्यक्ष भण्डारीको भनाइ छ ।
संघले काउन्सिललाई स्वायत्त बनाउन काउन्सिलको सिफारिस समिति, बोर्डको गठन तथा कारबाही प्रक्रिया लगायतका विधेयकको २८ ठाउँमा संशोधनका लागि सुझाव दिएको छ ।
संघको सुझावपत्र बुझेपछि समितिका सभापति थापाले संघको सुझावलाई सकारात्मक रुपमा लिएको बताउदै समितिमा छलफल गरेर व्यवहारिक सुझावहरुलाई समेट्ने आश्वासन दिएका थिए ।
Discussion about this post