कञ्चनपुर – बैतडीको साविक आमचोरा गाउँ विकास समिति (हाल पञ्चेश्वर गाउँपालिका वडा नं. ४) बाट बसाइँसराइ गरी कञ्चनपुर, कैलाली र भारतको उत्तराखण्डमा बसोबास गर्ने सैलोडी भट्टहरूले आफ्नो पहिचान र भाइचारा कायम राख्ने उद्देश्यले स्थापना गरेको ‘सैलोडी भट्टहरूको माउ समाज’ को साधारण सभा कञ्चनपुरमा सम्पन्न भएको छ।
भौगोलिक दूरीका कारण आपसमा चिनजान र सद्भाव कायम राख्न समस्या भएपछि २०७२ सालमा यो समाजको स्थापना गरिएको समाजका सचिव भागवत देव भट्टले जानकारी दिनुभयो। उहाँका अनुसार, समाजको मुख्य उद्देश्य सम्पूर्ण सैलोडीहरूमा आपसी सद्भाव र भाइचारा कायम राख्नु हो।
स्थापनाकालदेखि नै समाजले आवश्यकता परेका सदस्यहरूलाई सहयोग गर्दै आएको छ। भविष्यमा पनि निरन्तर सहयोग गर्नका लागि समाजले अक्षयकोष समेत स्थापना गरेको छ।
शनिबार सम्पन्न साधारण सभामा सैलोडी मूल भई कैलाली, कञ्चनपुर र भारतको उत्तराखण्डमा बसोबास गर्ने ५० जनाभन्दा बढी सैलोडी भट्टहरूको सहभागिता रहेको थियो। साधारण सभाको अध्यक्षता समाजका अध्यक्ष तारा दत्त भट्टले गर्नुभएको थियो भने कार्यक्रम सञ्चालन सचिव भागवत देव भट्टले गर्नुभएको थियो।
साधारण सभाको अवसरमा समाजले वृद्धाश्रममा फलफूल तथा खीर वितरण गरी सामाजिक कार्य पनि गरेको छ। यसैबीच, समाजले हरिष भट्टको नेतृत्वमा १३ सदस्यीय नयाँ कार्यसमिति समेत गठन गरेको छ।
Discussion about this post