खोलामा डुब्दै गरेको गाईको स्थानीय युवाहरूद्वारा उद्धार

कञ्चनपुर — कञ्चनपुरको भीमदत्त नगरपालिका वडा नम्बर -२ भासी खोलामा डुबिरहेको गाईलाई स्थानीय युवाहरूले सकुशल उद्धार गरेका छन्।

स्थानीय स्रोतका अनुसार गाई भासी खोलामा डुब्न थालेपछि त्यहाँ उपस्थित स्थानीय युवाहरूले जोखिम मोलेर उद्धार गरेका हुन्। उद्धारमा रिभरसाइड खाजा घरका सञ्चालकसहित अन्य युवाहरू सक्रिय रुपमा सहभागी थिए।

उनीहरूले गाईलाई पानीबाट निकालेर सुरक्षित स्थानमा पुर्याएका छन्। उक्त उद्धार कार्यले स्थानीयस्तरमा मानवीयताको उत्कृष्ट उदाहरण प्रस्तुत गरेको छ।

स्थानीयवासीले उद्धारकर्ताहरूको प्रशंसा गर्दै यस्तो सकारात्मक क्रियाकलापले समाजमा सहकार्य, सद्भाव र संवेदनशीलता फैलाउने विश्वास व्यक्त गरेका छन्।