कैलालीः विपद् जोखिम न्यूनीकरण तथा पूर्वतयारीलाई थप सशक्त बनाउने उद्देश्यले कैलालीको चुरे गाउँपालिका वडा नम्बर ३ मा दुई वटा सामुदायिक विपद् व्यवस्थापन समिति (सीडीएमसी) गठन गरिएको छ। कोकाकोला फाउण्डेशनको आर्थिक सहयोग तथा नेपाल राष्ट्रिय समाज कल्याण संघ (एनएनएसडब्ल्यूए) र मर्सिकोर नेपालद्वारा सञ्चालित पूर्वानुमानमा आधारित पूर्वकार्यको सुदृढीकरण (सान) परियोजनाअन्तर्गत वडा कार्यालयको समन्वयमा चुरे गाउँपालिकामा पहिलो पटक सीडीएमसीहरू गठन गरिएको हो।
एनएनएसडब्ल्यूए सान परियोजनाका कार्यक्रम सहायक अधिकृत हरि लोहारले भोजराज क्षेडालको संयोजकत्वमा ९ सदस्यीय श्री कालिका सामुदायिक विपद् व्यवस्थापन समिति र चक्र बहादुर खत्रीको संयोजकत्वमा ११ सदस्यीय श्री लेकवेसी सामुदायिक विपद् व्यवस्थापन समिति गठन गरिएको बताउनुभयो। उहाँले दुवै समितिलाई वडा कार्यालयमा सूचीकृत गरिएको जानकारी दिनुभयो। उहाँले चुरे गाउँपालिकाका अन्य वडाहरूमा पनि आवश्यकता अनुसार समिति गठन गरिने बताउनुभयो।
त्यस्तै, सूचना व्यवस्थापन अधिकृत संगिता पालले संस्थाले यसअघि चुरे गाउँपालिकामा विभिन्न चरणमा गरि पाँच दिने समुदाय प्रतिकार्य टोली तालिम सञ्चालन गरिसकेको जानकारी दिनुभयो। उहाँका अनुसार, सो तालिममा सहभागी व्यक्तिहरूमध्येबाटै अहिले सीडीएमसी गठन गरिएको हो। उहाँले तालीम प्राप्त व्यक्तिहरू समिति सदस्य भएकाले उनीहरूले विपद् पूर्वतयारी र प्रतिकार्यमा प्रभावकारी ढङ्गले काम गर्न सक्ने विश्वास व्यक्त गर्नुभयो।
चुरे गाउँपालिका वडा नम्बर ३ का वडाध्यक्ष खगेन्द्र खडायतले संस्थाले आफ्नो वडामा आएर विपद्को क्षेत्रमा प्रत्यक्ष रूपमा काम गरेकोमा आभार प्रकट गर्नुभएको छ। साथै, उहाँले अब पूर्वसूचना कार्यदल, खोज तथा उद्धार कार्यदल र प्राथमिक उपचार कार्यदल गठन गरी आवश्यक तालीम र सामग्रीहरू उपलब्ध गराउन आग्रह गर्नुभएको छ।
नव गठित समिति सदस्यहरूले आगामी दिनमा समुदायको सुरक्षा र विपद् व्यवस्थापनको क्षेत्रमा जिम्मेवार भएर काम गर्ने प्रतिबद्धता व्यक्त गरेका छन्।
स्थानीय तहसँगको सहकार्यमा गरिएको यो पहलले समुदायमा विपद् प्रतिकार्य क्षमता अभिवृद्धि गर्दै दीर्घकालीन सुरक्षा संरचना निर्माण गर्ने विश्वास गरिएको छ। यसले जोखिम न्युनिकरणदेखि उद्धारसम्मका प्रयासहरूलाई स्थानीय नेतृत्वमा अझ प्रभावकारी बनाउने छ।
Discussion about this post