किन बन्द भयो उत्तर कोरियाको प्रसिद्ध वोनसन-काल्मा बिच रिसोर्ट ?

काठमाडौँ । उत्तर कोरियाले आफ्नो प्रसिद्ध वोनसन-काल्मा बीच रिसोर्ट अचानक विदेशी पर्यटकहरूको लागि बन्द गरेको छ ।

उत्तर कोरियाली सरकारले यस रिसोर्ट मार्फत विदेशी पर्यटकहरूलाई लोभ्याएर आफ्नो विदेशी मुद्रा भण्डार बढाउन चाहेको थियो । यो रिसोर्ट उत्तर कोरियाली शासक किम जोङ उनको सपनाको परियोजना मानिन्थ्यो । अब यसको अचानक बन्दले धेरै प्रश्नहरू खडा गरेको छ ।

वोनसन-काल्मा बीच रिसोर्ट उत्तर कोरियाको पूर्वी तटमा अवस्थित एक अद्भुत पर्यटकीय स्थल हो । यो २०१० मा निर्माण गर्न सुरु गरिएको थियो र यसलाई उत्तर कोरियाको ‘हवाई’ भनिन्थ्यो । यो जुलाई १ मा स्थानीय पर्यटकहरूको लागि खोलिएको थियो ।

रिसोर्टमा विलासी होटल, समुद्र तट, पानी पार्क र किनमेल केन्द्रहरू जस्ता सुविधाहरू छन् । यस रिसोर्टमा एक पटकमा लगभग २० हजार मानिसहरू बस्न सक्छन् । यद्यपि, अब यसको चमक फिक्का हुँदै गएको देखिन्छ ।

उत्तर कोरियाको आधिकारिक पर्यटन वेबसाइट डीपीआर कोरिया टुरले कुनै ठोस कारण नदिई रिसोर्ट अस्थायी रूपमा बन्द भएको बताएको छ । तर केही रिपोर्टहरूले एक रूसी पत्रकारको रिपोर्टका कारण बन्द गरिएको दाबि गरिएको छ ।

यी पत्रकार रुसी विदेशमन्त्री सर्गेई लाभरोभसँग रिसोर्टमा गएका थिए र उनले त्यहाँ उपस्थित ‘पर्यटकहरू’ वास्तविक पर्यटक नभएर सरकारले पठाएको बताएका थिए । यो खुलासा पछि, उत्तर कोरियाको विश्वसनीयतामा क्षति पुगेको ठानिएको छ ।

रिसोर्ट चलाउन धेरै खर्च लागिरहेको र विदेशी पर्यटकहरू नआएमा रुबल, युआन वा डलर जस्ता विदेशी मुद्रा उपलब्ध नहुने हुनाले रिसोर्ट चलाउन गाह्रो बनाउन सक्ने रिपोर्टमा उल्लेख छ ।

यस बाहेक, अन्य रिपोर्टमा रिसोर्टलाई पूर्ण रूपमा तयार पार्न वा अन्य कुनै आन्तरिक कारणले बन्द गरिएको हुन सक्ने बताइएको छ ।

उत्तर कोरियाले विदेशी पर्यटकहरूलाई रिसोर्ट भ्रमण गर्न अनुमति दिँदा नकारात्मक परिणामहरू हुने डरले यो निर्णय लिएको समेत दाबी गरिएको छ । यो प्रतिबन्धले रूसी पर्यटकहरूमा धेरै प्रभाव पार्नेछैन, तर यात्राको दूरी र लागतका कारण, यहाँ रूसी पर्यटकहरूलाई आकर्षित गर्न गाह्रो रहेको बताइन्छ ।