बैतडीकी ११ वर्षीया ललिता भाटको जीवन रक्षाका लागि सहयोग अपिल

बैतडी, असार ३१ — बैतडीको दशरथचन्द नगरपालिका–१, मुडापकी ११ वर्षीया ललिता भाट ज्यान संकटमा परेकी छिन्। पेट दुखाईको गम्भीर समस्यापछि हाल डडेल्धुरा अस्पतालमा उपचाररत ललितालाई आर्थिक अभावले थप पीडा दिएको छ।

सानै उमेरमा आमाको माया गुमाएकी ललिता अहिले बाबु कृष्णसिंह भाटको कमजोर आर्थिक अवस्थाका कारण उपचार खर्च जुटाउन संघर्षरत छिन्। यही असार २७ गते अचानक पेट दुखाइ भएपछि भूमिसमस्या समाधान आयोग बैतडीका अध्यक्ष रमेश पाण्डेयको पहलमा उनलाई डडेल्धुरा अस्पताल पुर्‍याइएको थियो।

अस्पतालमा गरिएको शल्यक्रियापछि अहिले ललिता गम्भीर अवस्थाबाट गुज्रिरहेकी छिन्। यत्तिबेला उनका आफन्त, स्थानीय बासिन्दा र सामाजिक अभियन्ताहरू उनको उपचारमा सहयोग जुटाउने अभियानमा लागिपरेका छन्।

नेपाल राष्ट्रिय मावि, पालीमा अध्ययनरत ललिताको उपचारमा सहयोग गर्न सामाजिक अभियन्ता महेशराज भट्टले आग्रह गरेका छन्। हालसम्म विभिन्न मनकारी व्यक्तिहरुको साथ र सहयोगमा एक लाख रुपैयाँभन्दा बढी रकम संकलन भइसकेको छ। तर, उपचार अझै जारी रहेकाले थप आर्थिक सहयोग अत्यावश्यक रहेको भट्टले बताए।

ललिताको जीवन बचाउन सहयोग गर्न चाहने महानुभावहरूले उनका आफन्त लक्ष्मी भाटको खातामा रकम जम्मा गर्न सक्नेछन्।

सहयोगको खाता विवरण:

खातावालाको नाम: लक्ष्मी भाट
बैंक: नेपाल इन्भेष्टमेन्ट मेगा बैंक लिमिटेड
खाता नम्बर: ०६५०५०५०५०२९११४९

सानो सहयोगले पनि ललिताको जीवनमा ठूलो परिवर्तन ल्याउन सक्छ। मानवताको नाताले सबैलाई ललिताको उपचारमा हातेमालो गर्न हार्दिक अनुरोध गरिएको छ।