कञ्चनपुर । सार्क एजुकेसन फाउण्डेशनले विद्यार्थीहरूमा नेतृत्व र देशभक्ति प्रवर्द्धन गर्ने उद्देश्यका साथ एक विशेष सेमिनार सम्पन्न गरेको छ।
आइतबार आयोजित उक्त कार्यक्रममा सुदूरपश्चिम प्रदेशका प्रहरी प्रमुख डिआईजी डम्बर बहादुर बिकले मुख्य प्रशिक्षकका रूपमा विद्यार्थीहरूलाई महत्वपूर्ण प्रशिक्षण दिनुभएको छ।
डिआईजी बिकले आफ्नो लामो अनुभव साट्दै विद्यार्थीहरूलाई देश, पढाइ र परिवारप्रतिको दायित्वबारे गहन प्रेरणा दिनुभयो। उहाँले युवा अवस्थामै नेतृत्व क्षमता विकास गर्न र देशप्रतिको प्रेम जगाउन सके मात्र भविष्यमा सफल नागरिक बन्न सकिनेमा जोड दिनुभयो।
सार्क एजुकेसन फाउण्डेशनका कार्यकारी निर्देशक डा. लक्ष्मण बस्नेतले कार्यक्रमको महत्वबारे प्रकाश पार्दै यस्ता सेमिनारले युवाहरूमा सकारात्मक सोच र सामाजिक उत्तरदायित्व विकास गर्न मद्दत पुग्ने बताउनुभयो। उहाँले भन्नुभयो “आजका युवा नै भोलिका राष्ट्र निर्माता हुन्, हामीले उनीहरूलाई किताबी ज्ञानका साथसाथै देशप्रेम र नेतृत्वका गुणहरू पनि सिकाउनु आवश्यक छ। यस्ता कार्यक्रमहरूले उनीहरूलाई जिम्मेवार नागरिक बन्न प्रेरित गर्छ।”
कार्यक्रममा सहभागी विद्यार्थी सुरज पन्तले यो प्रेरणादायक कार्यक्रम बाट आफूहरूले धेरै कुरा सिक्ने मौका मिलेको बताएका छन्।
आयोजकका अनुसार, यस कार्यक्रमबाट विद्यार्थीहरूले आफ्नो देश, परिवार र आफ्नो व्यक्तिगत दायित्वलाई अझ गहिराइमा बुझी सोही अनुरूप व्यवहार गर्ने विश्वास लिइएको छ।
Discussion about this post