कञ्चनपुर – प्रगतिशील लेखक संघ नेपाल कञ्चनपुरको आयोजना तथा भीमदत्त नगरपालिका वडा नम्बर १८ को प्रवर्द्धनमा शनिबार जनज्योति माध्यमिक विद्यालयको सभाहलमा विद्यालयस्तरीय कविता प्रतियोगिता र नेपाल-भारत काव्य गोष्ठी सम्पन्न भएको छ।
प्रतियोगितामा भीमदत्त नगरपालिकाभित्रका १४ विद्यालयका २८ जना विद्यार्थीले सहभागिता जनाएका थिए। यसमा लिटिल बुद्ध एकेडेमीकी आरती नाथ प्रथम भइन् भने आदर्श विद्या निकेतनकी सन्ध्या बोहरा द्वितीय, महेन्द्रनगर नमुना माविकी प्रतिज्ञा पन्त तृतीय र लक्ष्मी मावि बागफाँटाकी कुसुम जोशी सान्त्वना पुरस्कार प्राप्त गर्न सफल भए। विजयी विद्यार्थीहरूलाई क्रमशः २ हजार, १ हजार ५ सय, १ हजार र ५ सय रुपैयाँ नगद सहित प्रमाणपत्र प्रदान गरिएको थियो।
कार्यक्रमका प्रमुख अतिथि भीमदत्त नगरपालिका वडा नम्बर १८ का वडा अध्यक्ष रवीन्द्र देवकोटाले यस्ता साहित्यिक कार्यक्रमले विद्यार्थीहरूमा सिर्जनशीलताको विकास हुने र कला, साहित्य तथा संस्कृतिको संरक्षणमा महत्त्वपूर्ण भूमिका खेल्ने बताए।
प्रगतिशील लेखक संघ नेपाल कञ्चनपुरका अध्यक्ष प्रजापति नेगीले सभापतित्व गर्दै साहित्यले समाजलाई रूपान्तरण गर्न सक्ने र यस्ता गोष्ठीहरूले नेपाल र भारतबीचको साहित्यिक सम्बन्धलाई थप सुदृढ बनाउने धारणा व्यक्त गरे। साथै उहाँले आगामि दिनमा पनि यस्ता कार्यक्रमहरूलाई निरन्तरता दिने प्रतिवद्धता जनाए।
कार्यक्रममा प्रगतिशील लेखक संघका केन्द्रीय सदस्य रमेश पन्त ‘मितबन्धु’, पूर्व राष्ट्रिय परिषद् सदस्य जगदीश ओझा, पूर्व केन्द्रीय सदस्य वीर बहादुर चन्द ‘विश्राम’ लगायत विशिष्ट अतिथिहरूको उपस्थिति थियो।भारतबाट बुलन्दी साहित्य सेवा समितिका प्रतिनिधि डा. विवेक बादल बाजपुरी, अशोक अञ्जना र रोहित तिवारी लगायतका साहित्यकारहरूको पनि सहभागिता रहेको थियो।
सोही अवसरमा रमेश पन्त ‘मितबन्धु’, जगदीश ओझा, वीर बहादुर चन्द ‘विश्राम’, संविधान सभा सदस्य पुरन सिंह दयाल, सह-प्राध्यापक हरिप्रसाद खतिवडा, नारायण लम्साल, डा. विवेक बादल बाजपुरी, अशोक अनजाना, रोहित तिवारी लगायतका साहित्यकारहरूलाई सम्मान गरिएको थियो।
कार्यक्रममा पुरन सिंह दयाल ‘कारागार को ढोका बाट चियाउँदा’ नामक पुस्तकको पनि विमोचन गरिएको थियो।
Discussion about this post