काठमाडौं – त्रिभुवन विश्वविद्यालयको उपकुलपतिमा प्रा.डा. दिपक अर्याल नियुक्त भएका छन्। प्रधानमन्त्री एवं विश्वविद्यालयका कुलपति केपी शर्मा ओलीले मंगलबार उनलाई नियुक्त गरेका हुन्।
शिक्षामन्त्री रघुजी पन्तको अध्यक्षतामा गठित सिफारिस समितिले उपकुलपतिका लागि तीन नाम सिफारिस गरेको थियो—प्रा.डा. दिपक अर्याल, प्रा.डा. खड्ग केसी र प्रा.डा. विनिल अर्याल। सोही सिफारिस सूचीबाट कुलपति ओलीले दिपक अर्याललाई चयन गरेका हुन्।
प्रा.डा. अर्याल त्रिभुवन विश्वविद्यालयअन्तर्गत जल तथा मौसम विज्ञान केन्द्रीय विभागका पूर्वप्रमुख हुन्। उनी उच्च शिक्षाको शैक्षिक प्रशासन र अनुसन्धान क्षेत्रमा अनुभवी व्यक्तित्व मानिन्छन्।
यसअघि त्रिविका उपकुलपति रहेका प्रा.डा. केसरजंग बरालले चैत १५ गते राजीनामा दिएपछि सो पद रिक्त रहँदै आएको थियो। करिब चार महिनापछि विश्वविद्यालयले नयाँ उपकुलपति पाएको हो।
शिक्षा क्षेत्रमा योगदान र कार्यदिशाका हिसाबले प्रा.डा. अर्यालको नियुक्तिलाई विश्लेषकहरूले सकारात्मक रूपमा हेरेका छन्। अब उनले त्रिविको शैक्षिक गुणस्तर, प्रशासनिक सुधार र अनुसन्धान प्रवर्द्धनमा कस्तो नेतृत्व दिन्छन् भन्नेमा चासो देखिएको छ।
Discussion about this post