कञ्चनपुर । सार्क एजुकेसन फाउण्डेशनले माध्यमिक शिक्षा परीक्षा (एसईई) मा उत्कृष्ट नतिजा ल्याउन सफल विद्यार्थीहरूको दिक्षान्त समारोह सम्पन्न गरेको छ। यस अवसरमा विद्यार्थीहरूलाई सफलताको प्रमाणपत्र र मायाको चिनो प्रदान गर्दै उनीहरूको उज्ज्वल भविष्यको कामना गरिएको छ।
शुक्रबार आयोजित उक्त कार्यक्रममा एसईई परीक्षामा सफल ३३ जना विद्यार्थीहरूलाई सुदूरपश्चिम प्रदेशका पूर्व मुख्यमन्त्री राजेन्द्र रावल र सार्क एजुकेसन फाउण्डेशनका कार्यकारी निर्देशक डा. लक्ष्मण बस्नेतले संयुक्त रूपमा प्रमाणपत्र प्रदान गर्नुभएको थियो।
कार्यक्रममा विद्यार्थीहरूलाई सफल बनाउन अहोरात्र खटिएका शिक्षकहरूलाई समेत कदर पत्र प्रदान गरी उनीहरूको योगदानको उच्च सम्मान गरिएको थियो।
सार्क एजुकेसन फाउण्डेशनका कार्यकारी निर्देशक डा. लक्ष्मण बस्नेतले विद्यार्थीहरूको सफलतामा शिक्षक र अभिभावकको महत्वपूर्ण भूमिका रहेको बताउनुभयो। उहाँले शिक्षाको गुणस्तर अभिवृद्धि गर्न फाउण्डेशन सधैं प्रतिबद्ध रहेको र आगामी दिनमा पनि यस्ता प्रेरणादायी कार्यक्रमहरू आयोजना गरिरहने जानकारी गराउनुभयो। उहाँले विद्यार्थीहरूलाई भविष्यमा अझ मेहनत गरी देश र समाजका लागि योगदान दिन आग्रह समेत गर्नुभयो।
Discussion about this post