कञ्चनपुर । कञ्चनपुरको पर्यटकीय स्थलका रूपमा रहेको महाकाली झोलुङ्गे पुल क्षेत्रमा सरसफाइ कार्यक्रम सम्पन्न भएको छ । दोधारा चाँदनी नगरपालिकाको वडा नम्बर -४ मा स्थित एसियाको दोस्रो लामो महाकाली झोलुङ्गे पुलमा नगर प्रहरी, उत्थानशील युवा सञ्जाल, माइती नेपाल, निड्स नेपाल, स्थानीय व्यापारीको सहयोग र सहकार्यमा सरसफाइ कार्यक्रम सम्पन्न भएको उत्थानशील युवा सञ्जाल दोधारा चाँदनीका संयोजक दुर्गा बडूवालले बताउनुभयो ।
महाकाली झोलुङ्गे पुलको अवलोकन गर्ने पर्यटकलाई भित्र्याउन पुल क्षेत्र सरसफाइ तथा स्वच्छ बनाउन सरसफाइ कार्यक्रम सञ्चालन गरिएको उहाँले बताउनुभएको छ । पर्यटकीय क्षेत्रको रुपमा रहेको महाकाली झोलुङ्गे पुलमा झाडी तथा फोहर हुन थालेपछि नगर प्रहरी, उत्थानशील युवा सञ्जाल, नेपाल प्रहरी, माइती नेपाल, निड्स नेपाल, स्थानीय व्यापारीको सहयोग सरसफाइ कार्यक्रम गरिएको संयोजक दुर्गा बडूवालले बताउनुभएको छ ।
सफा, स्वस्थ र हरित दोधारा चाँदनी नगर बनाउने क्लिन सिटी, ग्रिन सिटी नारा अनुसार बृहत् जनचेतना मूलक सरसफाइ कार्यक्रम सञ्चालन गरिएको उहाँको भनाई छ । सबै क्षेत्र सँग सहकार्य र समन्वय गरी दोधारा चाँदनी नगरलाई सफा, स्वास्थ्य र हरित बनाउन सरसफाइ कार्यक्रम सञ्चालन गर्दै आएकामा धन्यवाद दिँदै ओमकार आधारभूत विद्यालयका शिक्षक टङ्कलाल जोशीले सरसफाइ कार्यक्रमलाई निरन्तरता दिँदै जानुपर्ने बताउनुभएको छ ।
झोलुङ्गे पुल पर्यटकहरूका लागि आकर्षणको केन्द्र भएको हुँदा यस क्षेत्रमा सरसफाइ लगायत पूर्वाधार विकासका कार्यक्रमलाई थप प्राथमिकता दिएकोमा दोधारा चाँदनी नगरपालिकालाई शिक्षक टङ्कलाल जोशीले धन्यवाद दिनुभएको छ । दोधारा चाँदनी नगरपालिकाले महाकाली झोलुङ्गे पुलमा निमार्ण सुरु गरेको सेल्फी पोईन्टले पर्यटकहरूलाई भित्र्याउन थप सहयोग गर्ने उहाँको भनाई रहेको छ ।
Discussion about this post