कञ्चनपुर। सुदूरपश्चिम प्रदेशका शिक्षकहरूको लुकेको प्रतिभालाई बाहिर ल्याउने उद्देश्यले आयोजना गरिएको नृत्य प्रतियोगितामा कञ्चनपुरको वेदान्त विद्या मन्दिर प्रथम भएको छ। शिक्षा विकास निर्देशनालय राजपुर दिपायल डोटीले सोमबार महेन्द्रनगरमा आयोजना गरेको यस प्रतियोगिताले शिक्षकहरूलाई आफ्नो कला प्रदर्शन गर्ने मञ्च प्रदान गरेको थियो।
प्रदेशका विभिन्न जिल्लाका शिक्षकहरूको सहभागिता रहेको यस प्रतियोगितामा कञ्चनपुरको वेदकोट नगरपालिका-३ दैजीस्थित वेदान्त विद्या मन्दिरका शिक्षकद्वय लालमणी जोशी र दिपीका खत्रीको टोलीले प्रथम स्थान हासिल गर्यो। उनीहरूले सुदूरपश्चिमको पहिचान झल्किने टिपिकल गीतमा आकर्षक नृत्य प्रस्तुत गरेका थिए।
प्रतियोगितामा द्वितीय स्थान कैलाली अत्तरियाको सत्यवाती विद्यालयका शिक्षिकाहरू आशिका भट्ट, मनिषा लामिछाने, बर्षा विष्ट र पार्वती कडायतको टोलीले प्राप्त गर्यो। तेस्रो स्थान डोटी रामपुर माविकी रश्मी श्रेष्ठले हासिल गरिन् भने भीमदत्त नगरपालिका-६ ऐठपुरका नवराज भट्टले सान्त्वना पुरस्कार प्राप्त गरे।
विजेताहरूलाई क्रमशः सान्त्वना पुरस्कारबापत ५ हजार, तृतीयलाई १० हजार, द्वितीयलाई १२ हजार र प्रथमलाई १५ हजार नगद सहित प्रमाणपत्र प्रदान गरिएको थियो।
आइतबार निर्देशनालयले विज्ञान, गणित, भाषा, संस्कृत साहित्य, संगीत तथा नृत्य, र विशेष कला गरी विभिन्न विधामा पनि प्रतिस्पर्धा गराएको थियो।
Discussion about this post