कञ्चनपुर । नेपाल रेडियोलोजिकल सोसाइटी र सरकारी रेडियोग्राफी संघको संयुक्त आह्वानमा देशभरका केन्द्रीय तथा सरकारी अस्पतालका रेडियोलोजी विभागहरूमा राष्ट्रियस्तरको कालोपट्टी विरोध कार्यक्रम जारी रहेको छ।
सरकारी रेडियोग्राफी संघले शनिबार एक विज्ञप्ति जारी गर्दै सोमबारसम्म यो आन्दोलन जारी रहने जनाएको छ।रेडियोग्राफी पेशाको उचित मान्यता, मर्यादा र भविष्यका लागि आवाज उठाउँदै यो विरोध कार्यक्रम आयोजना गरिएको बताइएको छ।
यसका मुख्य मागहरूमा पाँचौँ, सातौँ, नवौँ र एघारौँ तहका रेडियोग्राफी पदहरूमा तत्काल पदपूर्ति गर्नुपर्ने र स्वास्थ्य सेवातर्फ नवौँ तथा एघारौँ तहमा नयाँ रेडियोग्राफी पदहरू सिर्जना गर्नुपर्ने रहेका छन्।
आन्दोलनकारी संघसंस्थाहरूले सम्पूर्ण रेडियोग्राफर, रेडियोग्राफी टेक्नोलोजिस्ट र विद्यार्थीहरूलाई एकजुट भई आ-आफ्नो कार्यक्षेत्रमै शान्तिपूर्ण रूपमा कालोपट्टी बाँधेर विरोध प्रदर्शनमा सहभागी हुन आह्वान गरेका छन्।
उनीहरूले अहिले आवाज नउठाएमा भविष्यमा सधैँ मौन रहनुपर्ने अवस्था आउने भन्दै आफ्ना अधिकारका लागि बोल्न सबैलाई उत्प्रेरित गरेका छन्।रेडियोलोजी क्षेत्रमा लामो समयदेखि पदपूर्ति नहुँदा र नयाँ पद सिर्जना नहुँदा सेवा प्रवाहमा समेत असर परेको भन्दै यस आन्दोलनले सरकारलाई दबाब दिने अपेक्षा गरिएको छ।
मागहरू सम्बोधन नभएमा थप सशक्त आन्दोलनका कार्यक्रमहरू घोषणा गरिनेसमेत जानकारी गराइएको छ।
Discussion about this post