कञ्चनपुर । कञ्चनपुरको भीमदत्त नगरपालिकामा सञ्चालित सुरक्षित आप्रवासन (सामी) कार्यक्रमबारे सञ्चारकर्मीहरूसँग विस्तृत छलफल गरिएको छ। आइतबार भीमदत्त नगरपालिका रोजगार प्रवर्द्धन शाखाले आयोजना गरेको यस छलफल कार्यक्रममा सुरक्षित वैदेशिक रोजगारीका विभिन्न पक्षहरूमाथि प्रकाश पारिएको थियो।
रोजगार प्रवर्द्धन शाखा प्रमुख कृष्णबहादुर चन्दले गत पुस महिनादेखि भीमदत्त नगरपालिकामा सुरक्षित आप्रवासन (सामी) कार्यक्रम सञ्चालनमा रहेको जानकारी दिए। उनका अनुसार यस कार्यक्रमअन्तर्गत श्रम स्वीकृतिदेखि लिएर वैदेशिक रोजगारीमा रहेका आफन्तहरूलाई परामर्शका कार्यक्रमहरू सञ्चालन भइरहेका छन्।
पछिल्ला वर्षहरूमा वैदेशिक रोजगारीमा जाने नेपाली नागरिकहरू स्वयं संकटमा पर्ने र उता घरपरिवारमा समेत समस्या उत्पन्न हुने अवस्थालाई मध्यनजर गर्दै वैदेशिक रोजगारीलाई सुरक्षित र मर्यादित बनाउने उद्देश्यले सरोकारवालाहरूसँग छलफल गरिएको चन्दले बताए।
भीमदत्त नगरपालिका रोजगार प्रवर्द्धन शाखा सामी कार्यक्रमकी मनोसामाजिक परामर्शदाता निर्मला मल्लले नगरपालिकाभर गएर वैदेशिक रोजगारीमा रहेका आफन्त र घरपरिवारलाई सुरक्षित राख्न परामर्श दिइरहेको जानकारी दिइन्।
आप्रवासी सेवा केन्द्रका कार्यक्रम अधिकृत विष्णु अर्यालले एक कार्यपत्र प्रस्तुत गर्दै वैदेशिक रोजगारीलाई थप सुरक्षित बनाउन समाजमा समेत सकारात्मक सोच आवश्यक रहेको औंल्याए। उनले सूचना तथा परामर्श, कानुनी परामर्श, कानुनी सहजीकरण, सीपमूलक तालिम, मनोवैज्ञानिक परामर्श, वित्तीय सहजीकरणसहितका कार्यक्रमहरूलाई प्रभावकारी बनाउनुपर्नेमा जोड दिए।
छलफल कार्यक्रममा भीमदत्त नगरपालिकाका प्रशासकीय अधिकृत हरिसिंह धामीले वैदेशिक रोजगारीको संरक्षणका लागि पालिकाले अघि सारेका कार्यक्रमहरूमा सञ्चारकर्मीहरूले समेत सकारात्मक भूमिका निर्वाह गर्नुपर्नेमा जोड दिएका छन्।
Discussion about this post