युवाकवि प्रेमप्रकाश कलौनीलाई सुदूरपश्चिम प्रादेशिक कविता महोत्सवको उपाधि

कञ्चनपुर – सुदूरपश्चिम प्रादेशिक कविता महोत्सव २०८२ मा युवाकवि प्रेमप्रकाश कलौनीले प्रथम स्थान हासिल गर्नुभएको छ। ५५ जना प्रतिस्पर्धी कविहरूलाई पछि पार्दै कलौनीले नगद रु. २५,००० र प्रमाणपत्रसहितको पुरस्कार जित्न सफल हुनुभएको हो।

बैतडी जिल्लाको तल्लोस्वराड सीमान्त क्षेत्र, शिवनाथ गाउँपालिकाको पौखर गाउँमा जन्मनुभएका कलौनी हाल पढाइको सिलसिलामा महेन्द्रनगरमा सक्रिय हुनुहुन्छ। उहाँ छन्द कविता लेखनमा एक आशालाग्दा प्रतिभाका रूपमा परिचित हुनुहुन्छ। यसअघि पनि विभिन्न साहित्यिक संघसंस्थाहरूबाट सम्मानित तथा पुरस्कृत भइसक्नुभएका कवि कलौनीको यो सफलता उहाँका लागि एउटा प्रेरणादायी खुड्किलो बन्ने विश्वास गरिएको छ।

सुदूरपश्चिम प्रदेश प्रज्ञा प्रतिष्ठानद्वारा आयोजित दुई दिने पहलमान सिंह स्वार अन्तर्राष्ट्रिय साहित्य सम्मेलन तथा प्रादेशिक कविता महोत्सव २०८२ जेठ २४ र २५ गते सम्पन्न भएको थियो। कविता महोत्सवको पुरस्कार प्रतिष्ठानका उपकुलपति डा. टी.एन. जोशीले एक समारोहबीच प्रदान गर्नुभएको हो।

कार्यक्रममा महत्वपूर्ण साहित्यिक तथा सांस्कृतिक संवादका साथै साहित्यकार जगदीश ओझा र कविराज भट्टको प्रस्तुति रहेको कार्यक्रमका सहभागी खिमानन्द बडूले जानकारी दिनुभएको छ।