कञ्चनपुर । कञ्चनपुरको भीमदत्त नगरपालिका–३, महेन्द्रनगरमा रहेको मन्त्र हस्पिटल एण्ड रिसर्च सेन्टर प्रालिले पहिलो पटक भाँचिएको मेरुदण्डको सफल सल्यक्रिया (अप्रेसन) गरेको छ। अस्पतालले वेदकोट नगरपालिका–१ का ३१ वर्षीय धिरेन्द्र खत्रीको मेरुदण्डको सफल अप्रेसन गरेको हो।
मन्त्र अस्पतालका प्रबन्ध निर्देशक डा. गोविन्द रोकायाले अस्पताल स्थापना भएयता पहिलो पटक यस्तो जटिल अप्रेसन सफलतापूर्वक सम्पन्न भएको बताउनुभयो। उहाँका अनुसार ९ जेठ २०८२ मा बुटबलबाट महेन्द्रनगर आउने क्रममा बस दुर्घटनामा परेर घाइते भएका खत्रीको मेरुदण्ड भाँचिएको थियो। कोहलपुर मेडिकल कलेजमा गरिएको एमआरआईबाट मेरुदण्ड टुटेको पुष्टि भएपछि खत्री उपचारका लागि मन्त्र अस्पताल आएका थिए।
खत्रीको अप्रेसन अर्थोपेडिक चिकित्सकहरू डा. दुर्गेश चौधरी, डा. केशव भट्ट र डा. मुकेश गामीसहितको टोलीले सफलतापूर्वक सम्पन्न गरेको छ। स्थानीय स्तरमै यस्तो जटिल अप्रेसन सम्पन्न भएपछि खत्रीको परिवार हर्षित भएको छ। कम खर्चमा स्थानीय अस्पतालमै उपचार सम्भव भएकाले परिवारमा थप उत्साह देखिएको छ।
हाल घाइते खत्रीलाई चिकित्सकको निगरानीमा मन्त्र अस्पतालमै राखिएको छ। उनको थप उपचार केही दिनसम्म जारी रहनेछ। मन्त्र अस्पतालले यसअघि पनि जटिल प्रकृतिका बिरामीहरूको अप्रेसनमार्फत उपचार गर्दै आएको छ। साथै, सामाजिक उत्तरदायित्वअन्तर्गत निःशुल्क स्वास्थ्य शिविरलगायतका कार्यक्रमहरू सञ्चालन गर्दै आएको छ।
यो सफल अप्रेसनले कञ्चनपुरमा स्थानीय स्तरमै गुणस्तरीय स्वास्थ्य सेवा सम्भव भएको सन्देश प्रवाह गरेको छ।
Discussion about this post