कञ्चनपुर । विश्व वातावरण दिवसको अवसरमा कञ्चनपुरको भीमदत्त नगरपालिका–१८ मा रहेको इको पार्कमा नेपालको अग्रणी इन्टरनेट प्रदायक कम्पनी वर्ल्डलिंक कम्युनिकेसनको सहभागितामा बृहत् वृक्षारोपण कार्यक्रम सम्पन्न भएको छ।
भीमदत्त नगरपालिकाको वन, वातावरण, फोहर मैला तथा विपद् व्यवस्थापन शाखाको आयोजनामा भएको उक्त कार्यक्रममा जिल्ला समन्वय समिति, विभिन्न गैरसरकारी संस्था, जिल्ला प्रशासन कार्यालय, जिल्ला प्रहरी, सशस्त्र प्रहरी, नेपाली सेना, डिभिजन वन कार्यालय, इको क्लब, बाल क्लब र विद्यार्थीहरूको सक्रिय सहभागिता रहेको थियो।
वर्ल्डलिंक कम्युनिकेसन महेन्द्रनगर शाखाका प्रमुख धनराज उपाध्यायले कार्यक्रममा सहभागी हुँदै वातावरण संरक्षण र हरियाली प्रवर्द्धनमा यो पहलले महत्त्वपूर्ण योगदान पुग्ने विश्वास व्यक्त गर्नुभयो। उहाँले वर्ल्डलिंकले आगामी दिनमा पनि यस्ता सामाजिक र वातावरणीय कार्यक्रमहरूलाई निरन्तरता दिने प्रतिबद्धता जनाउनुभयो।
कार्यक्रममा इको पार्क र डिभिजन वन कार्यालय परिसरमा गरी कुल ५०० बिरुवा रोपिएको छ, जसले स्थानीय स्तरमा वातावरणीय जागरूकता अभिवृद्धि गर्ने अपेक्षा गरिएको छ।
संयुक्त राष्ट्रसङ्घीय वातावरण कार्यक्रमको आह्वानमा सन् १९७३ देखि हरेक वर्ष जुन ५ मा विश्व वातावरण दिवस मनाइँदै आएको छ। नेपालको संविधानले प्रत्येक नागरिकलाई स्वच्छ वातावरणको मौलिक हक सुनिश्चित गरेको छ भने वातावरणीय प्रदूषण वा ह्रासबाट पीडितलाई कानुनबमोजिम क्षतिपूर्तिको व्यवस्था गरेको छ।
वर्ल्डलिंकको सक्रिय सहभागिताले यो कार्यक्रमले कञ्चनपुरमा वातावरण संरक्षण र दिगो विकासका लागि सामूहिक प्रयासको महत्वलाई थप उजागर गरेको छ।
Discussion about this post