काठमाण्डौ – नेकपा एकीकृत समाजवादीका अध्यक्ष माधवकुमार नेपालले पतञ्जलीको जग्गा सट्टापट्टा प्रकरणमा आफू निर्दोष रहेको दाबी गर्नुभएको छ । पार्टी केन्द्रीय कार्यालयमा हिजो भएको कार्यकर्ता भेलामा उहाँले पतञ्जलीको जग्गा सट्टापट्टा प्रकरणमा अख्तियार दुरूपयोग अनुसन्धान आयोगको निर्णयप्रति असन्तुष्टि जनाउँदै कानूनी उपचारका लागि छिट्टै प्रक्रिया शुरु गर्ने बताउनुभयो ।
मन्त्रिपरिषदलाई रहेको नीतिगत निर्णयको अधिकारअनुसार अधिकतम नागरिकको हितमा स्वास्थ्य सेवा सञ्चालनका लागि पतञ्जलीलाई जग्गा उपलब्ध गराइएको उहाँको दाबी छ । उहाँले न्यायका लागि कानूनी उपचारमा जान कानूनविदसँग परामर्श भइरहेको पनि बताउनुभयो ।
यस्तै नेकपा एकीकृत समाजवादीले पार्टी र नेतृत्वविरुद्ध हुने कुनै पनि षड्यन्त्रको प्रतिवाद गरिने बताएको छ । पार्टी महासचिव घनश्याम भुसालले विज्ञप्ति निकालेर वर्तमान सरकारले राजनीतिक बदलाको भावनाबाट प्रेरित रही आफ्नो पार्टी विरुद्ध विगतदेखि नै षडयन्त्रहरू गर्दै आएको दाबी गर्नुभएको छ ।
पतञ्जली जग्गा प्रकरणमा पार्टी अध्यक्ष तथा पूर्वप्रधानमन्त्री माधवकुमार नेपालविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेकोमा यसलाई एकीकृत समाजवादीले पार्टीविरुद्धको षड्यन्त्र भनेको हो ।
विज्ञप्तिमा भुसालले पार्टी अध्यक्षले नै कुनै कमजोरी नगरेको बताएको भन्दै कानूनी प्रक्रियाको सामना गर्ने पनि उल्लेख गर्नुभएको छ । अख्तियार दुरुपयोग अनुसन्धान आयोगले नेपालसहित जग्गा हिनामिना प्रकरणका प्रतिवादीहरूविरुद्ध हिजो विशेष अदालतमा मुद्दा दायर गरेको हो ।
Discussion about this post