कञ्चनपुर । वेदकोट नगरपालिका–७ सुडामा अवस्थित घटाल बहुमुखी क्याम्पसले त्रिभुवन विश्वविद्यालय अन्तर्गत सञ्चालित बिबिएस प्रथम वर्षको नतिजामा जिल्लामै पहिलो स्थान हासिल गरेको दाबी गरेको छ। क्याम्पसका प्रमुख देव दत्त पन्तले यो उपलब्धि क्याम्पस र विद्यार्थीहरूका लागि गौरवको विषय भएको बताउनुभएको छ।
क्याम्पस प्रमुख पन्तका अनुसार, “हामीले विद्यार्थीको शैक्षिक गुणस्तर अभिवृद्धिमा निरन्तर मेहनत गर्दै आएका छौं र यसपटक जिल्लामै उत्कृष्ट नतिजा ल्याउनु हाम्रो सामूहिक प्रयासको सफल परिणाम हो।” त्रिभुवन विश्वविद्यालयको हालै प्रकाशित नतिजामा बिबिएस प्रथम वर्षमा घटाल बहुमुखी क्याम्पसका विद्यार्थीले उच्च अंक प्राप्त गर्दै जिल्लामै अग्रस्थान हासिल गरेको जनाइएको छ।
नतिजाको विवरणबारे क्याम्पस प्रमुख पन्तले जानकारी गराउँदै बिबिएस प्रथम वर्षको कूल नतिजा ४४% रहेको बताउनुभयो। जसमध्ये २९% विद्यार्थीले प्रथम श्रेणीमा उत्तीर्ण गरेका छन् भने ४२% विद्यार्थीले द्वितीय श्रेणी हासिल गरेका छन्। बाँकी २९% विद्यार्थी भने उत्तीर्ण श्रेणीमा रहेका छन्।
क्याम्पसले व्यवसाय शिक्षामा गुणस्तरीय शिक्षण र विद्यार्थीको व्यक्तिगत विकासमा जोड दिँदै आएको छ। यो उपलब्धिको स्थानीय समुदाय, अभिभावक तथा वेदकोट नगरपालिकाले समेत स्वागत गरेका छन्। क्याम्पस परिवारले आगामी दिनमा अझ राम्रो शैक्षिक वातावरण निर्माण गर्दै जिल्लामा उत्कृष्ट शैक्षिक गन्तव्यको रूपमा स्थापित गर्ने प्रतिबद्धता जनाएको छ।
Discussion about this post